السلام عليكم بدخل في الموضوع على طول بدون مقدمات
صديقتي الله يوفقها ويستر عليها انخطبت قبل فتره وكان ابوها شبه رافض الولد وانا وقفت معاها وقلت لها حاولي تقنعينه ومن هالكلام مدام الرجال كفو مو مهم الشكل لان ابوها كان متردد عشان شكله المهم الله تمم لها على خير وملكت البنت بنفس يوم ملكتها صارت مشاكل مع خوالها يعني يافرحه ماتمت
وطبعا انا ماقصرت معاها سويت لها كل الي انا بسويه لنفسي في حفلة الخطوبه والحمدلله طلعت حفلتها مرررة روووعه والكل انبسط مع انها هي كانت تسويها في البيت وتجيب بوفيه من مطعم ب4 الاف انا خليتها تحجز بفندق القاعه مع العشا ب5 الاف حتى في مكياجها انا اصريت عليها تروح مشغل حلو وطلعت تهبل ذاك اليوم مع ان امها تبيها تروح مشغل مشي الحال
زبدة الموضوع هي اعز صديقاتي لنا عشرة 7 سنين مع بعض
المهم اليوم الثاني من الحفله امها عطتها محاضرة طويلة عريضه عني انتبهي من صديقتك هاذي تراها سوسه ناويه تسرق زوجك لاتفكرينها تحبك ترا كل الصديقات عند الزواج والزوج يتغيرون ولاتخلينها تجي بيتك اذا تزوجتي ولا تعطينها رقم الثابت وغيري رقم جوالك ولا تعطينها اياه
وكلمت امها بعد الحفلة ب3 ايام قالت لي بوجهي يافلانه انتي المفروض ماتروحين المشغل تسوين مكياج المفروض انتي تعدلين نفسك وخلاص طيب انا كيفي غير كذا هاذي مو اي وحده هاذي اعز صديقاتي الله يشهد علي ان فرحتي ذاك اليوم كانها حفلتي مو حفلتها
وقالت لي بالحنه ماراح اعزم احد بس احنا واهل الولد يعني افهمي انتي مو معزومه ولا اشوف رقعة وجهك
وطبعا نفس اليوم الي ملكت فيه صديقتي كلمت امها ابارك لها تخيلوا انها ماقالت لي عقبالك قالت الله يرزقك بالوظيفة الزينه
المهم ان امها من قبل ماخلت خطابه مادقت عليها عشان تجيب لبنتها عريس والحين يوم انخطبت بنتها صارت تضايق اذا شافتها تكلم زوجها وتهاوشها وتقول لها قفلي وصارت كله تزعل منها علىاتفه الاسباب وتدعي عليها
واخوانها محد معطيها وجه ولا احد يوديها السوق عشان تتجهز ولا اي حاجه عكس اختها الكبيره الكل كان مبسوط لها ويساعدها
المهم اليوم الصباح كانت تكلمني ع المسن وتقول لي والله انا قبل شوي كنت اصيح قلت لها ليه ياقلبي صار شي جديد؟ قالت مشاكل اهلي ماتنتهي من يوم ماانخطبت الكل يقول لي استغلي هالفتره وانا مو مبسوطه بفترة خطوبتي اتمنى انها تعدي بسرعه
قلت لها تبين شوري ماتلاحظين من يوم ماانخطبتي وانتي في مشاكل؟
ارجعي استخيري او مو لازم تستخيرين في كل صلاة ادعي قولي يارب اذا لي خيرة في فلان يسر زواجي وسهله وتمم لي على خير واصرف عني مشاكل اهلي
قالت لي مجنونة انتي تبيني اتطلق؟
قلت لها لا لاتجيبين طاري الطلاق على لسانك بس ادعي بهالدعاء والله يكتب الي فيه الخير
قالت يعني هذا معنى كلامك يعني لو مالي خيره فيه يتفركش الزواج واصير مطلقه
قلت لها مو هذا قصدي انشاالله لك خيره فيه واذا مالك خيره فيه يتفركش من الحين وانتي بنت احسن من انك تطلقين بعد الزواج
قالت انا مرتاحه مع زوجي وانسي اني اشتكيت لك
مع السلامه
السؤال هل انا غلطانه؟
وهل الدعاء الي قلته لها فيه غلط؟
مع العلم ان في اشياء كثيره غلط هي تسويها واول ماانخطبت حذرتها منها واعطيهانصايح تخص المخطوبات والمتزوجات وارسلها ادعية لتسخير الزوج
وهي دايم تقول لي ماانسى وقفتك معي وقفتي معي واختي الي ولدتها امي ماوقفت معي
بليييز رايكم ونصايحكم بدون مجاملات