يا ماخذ ( القلب ) قلبـي ويـن وديتـه
نطرت قلبي يجي منك و لا جانـي !
رحت اتحراه يرجع والحشـا بيتـه
و الظاهر بقربك ارتـاح و تناسانـي
و شلـك بقلـبٍ تضمـه ما تمنيتـه
عادي تضمه ! و عادي تضم لك ثاني
ما هي غريبة ليـا جا لـك و ضميتـه
وسيع ذمة عسـى ربـي لا يبلانـي
ما خفـت ربـك و قلبـي . . ماتبنيتـه
غيرت قلبي علي و رحـت تجفانـي
ابيك تذكر و شلـي معـك سويتـه !
راجع ضميرك و رتب جملة أحزانـي
حتى الشعر فيك ضحكتـه . . و بكيتـه
يضحك على شانك و يبكي على شاني
في داخلـي لـك كـلامٍ ما تقهويتـه
كلام لو جيت أقولـه يثقـل لسانـي !
كلام في الصـدر مـن سبتـك كنيتـه
عجزت اقوله ما كن لساني حصانـي
حبل الوصل من يدينك ليـه هديتـه
حاولت أشيله لكن طاح مَا أمداني
وقفـت حتـى مكانـي ما تعديـتـه
كن الصبر مرنـي عجـل و تعدانـي !
فنجان فرقاك مـن صـدك تقهويتـه
والحزن غيم على الصدر و تقهواني
على كثر ما نزف جرحـي و داويتـه
على كثر ما ندمت و قلت وش جانـي !
الله يسامحـك قلبـي ويـن وديتـه
والله يسامحه قلبـي ويـن وداني