السلام عليكم ورحمة الله وبركاته
اتمنى يا اخواني اتساعدوني
القصه يا اخواني هي صديقتي هذي البنت والله انها عانت فزواجاها الامرين صديقتي ماشاء الله عليها ماعليها اقصور
حرمه قلبها ابيض وطيبه وااايد وتعشق عيالها بجنوووووون , اتزوجت وعمرها 13 سنه وطبعا غصبن عنها بانسان ماتحبه
ولا عمرها فكرت انها تر تبط فيه انسان خذ احلا سنين عمرها الريال اناني بكل ماتحمله الكلمه من معنى انسان مايخاف
ربه حارم زوجته من الفرحه حارمها من متعة الزواج دومم مشاكل لا يصرف عليها ولا على عيالها وهي والله الشاهد انه
كل ماطاح في مشكله توقف بجنبه وتعطيه من ذهبها اللي هي زهبت العرس , المهم الريال هذا تعبان فيه مرض الصرع
بعيد عنا وعنكم طبعا هذا المرض فيه من قبل العرس وصديقتي طبعا كانت مجبوره ع الزواج المهم وكل يوم الحرمه تقول
الله بيهديه وبينصلح حاله وبيحس فيني وفعياله لكن بدون جدوى الحرمه نفسيتها تعبانه انسانه مكسورة الحياة مع
هلانسان جحيم والله العظيم انها ماتقدر تجلس معاه دقيه وحده من كثر مشاكله مع الناس كل يوم له ديون كل يوم له قصه كل يوم له اعذار ومن كذبه لي كذبه لين ما الحرمه انفجرت مهمومه ماتعرف شو اتسوي العيال ماطالبهم ماتخلص
والريال ولا يحس ماعنده غير كلمت ماعندي فلوس الحرمه تعبت كل ماتشتكي عند اهلها يسعادونها ويقومون بالواجب ويكلمون الريال لكن لا حياة لمن تنادي الريال ماهمه حد ولا همه عياله سمعته طايحه عند الناس كل محد شافه قاله
انت تجي عندنا اتسلم علينا وتطلب من عندنا فلوس ياخي لا تجي دامنه بندفع حق سلامك بعد ! والله العظيم انه
صديقتي ملت من كلام الناس ملت من اهلها يردون اللوم عليها يقولون انتي صابره وساكته يعني بالله عليكم البنت شو
بتسوي يعني مهما كان البنيه ماتريد تحرم عيالها من ابوهم مع انه والله العيال كبار وعارفين انه ابوهم كذاب اناني
مايفكر فحد وعمره مافكر فيهم , تعرفون انهم يناموون كل واحد فغرفه وصديقتي حتى ريحته ماتحبها خلااص البنت كرهة
الريال من كثر مايهزئها ويضربها تكرهه كره العمى وماتقدر تخليه يلمسها . انا مابمدح صديقتي بس والله انها اتجنن حلوه
ماشاء الله عليها واللي يشوفها يقول انها بعدها بنت ماعرست والله اللي يشوفها مع عيالها يتحسبونهم خوانها كتكوته
ماشاء الله عليها المهم انا طرحت الموضوع لانه وايد يهمني اعرف شو راي الدين فقصة صديقتي . على فكره صديقتي
اتفضل انها تمارس العاده السريه على انها تمارسه مع زوجها , والله انها متعذبه وااايد دوم تخبرني تقولي شو اللي بين
الريال والحرمه غير كلمت حبيبي حبيبيتي حياتي وقلبي انا محروووومه من الحب محروومه من الراحه الجنسيه مع
حلالي محرومه من الفرحه محرومه من الضحكه والله انها كاسره خاطري واايد هالبنت والله تعور قلبي من كثر ماتبكي
اتقول انا خلااص ماقدر اكمل حياتي معااه ماريد اكسب اي حرااام من وراااه على فكره الريال يوم يريد ينام معاها طبعا
البنت تقوله ماريد تدرووون شو يسوي يوم تقوله لالالا مابي ؟ يروح يضربها ضرب ويشق ملابسها ويعتدي عليها شفتو
الوحشيه كيف ! زوجها ويعتدي عليها استغفر الله العلي العظيم . انا اريد اللحين الحل شو اتشورون عليها يا اهل العلم
والشورى استنى ردودكم بفارغ الصبر .
وجزاكم الله الف خير
اختكم ام سلوم