أغيـب ماهـو بكيفـي يابعـد حالـي
ظروفي اللي عـن اوصالـك تبعدنـي
والا انت غالي وتبقى عشقـي الغالـي
حـرام مابـه سـواك انتـه معذبنـي
تدري وش أصدق حقيقه وانت في بالي
لا قلت وينك مـن البـارح وتنشدنـي
قولـت هلابـك ومرحبتيـن بالغالـي
احسها اجمل سـؤال يمـر واسعدنـي
انا ظروفـي مابيـن المـر والحالـي
متخالـف الوقـت وأيامـه تعاتبـنـي
شفت وش اللي من الهاجوس يطرالي
لاضاق بالك هجوسـي حيـل يتعبنـي
انا على خبرك اشغالي هـي اشغالـي
بس التغيّر ترا اللـي صـار مقلقنـي
ماهو بكيفي وغصبـاَ عنـي أحوالـي
تفرض علـي البعـاد وتأخـذك منـي
هذا وانا اللـي كبـرت بحبـك لحالـي
ابعتـذر لـك ومـنـك ولاتقاطعـنـي