طيب لنفرض ان عيونك ولا شي ولا في امل تحلى فعينك ولا فعين غيرك؟؟
تعالي للشي اللي بعد الشعر والعيون
ممم بشرتك...
هاذي عاد يطول شرحها لاني احس الواحد ممكن يقنع نفسه باي شي مو حلو انه حلو الا البشره ماقد شفت احد بشرته شينه ومقتنع فيها
بس على الاقل الواحد يحاول يعالج وبعدين يخفي وبعدين يتعايش
تدرون وش المشكله المشكله اني احاول ما اتعمق بالتفاصيل بس كل ما اكتب فقره واقراها انا نفسي انساها كانت تبع ايش ولا بخصوص ايش فاعذروني لكن احاول اكتب كل شي اعرفه عن كل شي اكتبه عشان ان شاء الله تستفيدون لو من كلمه
نجي للبشره واللي بتخليك تدلعين وتحبين تدلعين وتصيرين دلوعه بدون ماتصيرين متصنعه
اول واكبر مشكله فالبشره هي الحبوب .. وهاذي بجد مشكله عويصه ومافي حل الا دكتورة الجلديه ..وتمتنعين عن الاكل اللي يطلع لك الحبوب وتحاولين تخفينها بدون ماتخلينها تلتهب ..والحبوب كل ماكثرتي فوقها طبقات مكياج كل مازودت المأساه سواء من ناحيه صعوبه العلاج بعدين لانك تخلينها تتلوث ومنظرها يصير شين ..
اذن هاذي المشكله اللي من جد مافي حل لاخفائها تماما لازم لازم تتعالج...
بالنسبه للمكياج معروف انه يزيد الطين بله اذا كثرتيه وهذا اللي غالبا يصير
لكن الصح ايش .. اولا تخفين الحبوب نفسها بشكل فردي بعد كذا تحطين كريم اساس حسب اللي يناسب بشرتك وبما انك فيك حبوب غالبا بشرتك دهنيه فخوذي كريم اساس مو دهني وتاكدي من هالشي .. ثالثا .. البودره السائبه عمري ماحسيت انها تضبط او تحلي على البشره اللي فيها حبوب اللي تخلي مكان الحبه يبان كانه مقشر الا طبعا اذا حطه خبير مكياج.. لكن بالشكل اليومي عن نفسي عمري ماشفته ضبط على وحده ..بعد كذا شوية بودره خدود بتطلع تجنن والافضل الابتعاد عن الوردي لانه يبرز المشكله وتذكرت كمان لما تاخذين كريم اساس احرصي انه مايكون اللي مايل على وردي الافضل والافضل تختارين كريم اساس على بيج او ذهبي وبودرة الخدود تكون درجات الترابي والمشمشي والموف تطلع مره حلوه بالنسبه للطريقه اسمحولي اقولكم بكل تواضع
اول شي لازم تكونين مغسله وجهك بصابونه طبيه مناسبه لك تشيل الدهون من وجهك عشان مكياجك يصير مرتب .. بعد كذا حطي كريم ترطيب مناسب..وبعدها الكونسيلر او مخفي العيوب وهنا احب الفت نظركم ان مخفي العيوب فالعاده يكون الابيض او البيج القوي سواء قلم او سائل تحطينه بعدين تحطين كريم الاساس فوقه.. هذا غلط فغلط لان المخفي هذا هو للبقع الغامقه او للي بشرتها مالها لون موحد.. لكن الحبوب اللي فالوجه المخفي حقها لونه اخضر .. تلاقينه فماركات كثير تحطينه باصبعك او بفرشه ..غالبا يكون بعلبه تلاقينها ثلاث الوان بيج او ابيض واخضر وبني البيج والابيض للتفتيح وتوحيد اللون والاخضر للحبوب والبني عشان تصغرين اماكن او تكبرين اماكن زي اللي تحطه حليمه بولند لتصغير حجم الانف ينحط من الجوانب بني بعدين تحطين فوقه كريم الاساس بدون ماتضغطين بقوه وينحف الانف ويطوله واغلب الفنانات يسوونه ... طلعنا عن الموضوع نرجع للحبوب .. الكونسيلر الاخضر تحطينه على كل حبه وتوزعينه عليها وبعدها تحطين كريم الاساس اللي يناسبك.. واحب افيدك اذا ودك تعرفين عن كريم اساس يجنن.... من عشقي للمكياج جربت كثيررررر ماركات بس قبل ثلاث اسابيع طحت على كريم اساس ابدااع يخلي وجهك ناعم ومخملي وزي االلمبه وبنفس الوقت مو ثقيل بصراحه روووعه جدا .. هو من ماركة فور ايفر ..تلاقينه فمحلات وجوه (فيسزز) فجده موجود فسوق حراء وفاماكن كثير وفالرياض موجود وفالشرقيه برضو .. وعلى فكره حاليا هالماركه ماكله الجو بقوه عندها الوان كحل تجنن خصوصا الازرق التركواز سائل مائي تحطينه كحل او ظل يجنن وفي برضو كحل موف يجنن وناعم مره .. والوان الظل حقتهمومميزه .. وكريم الاساس ذا بصراحه بطيح فيه طيحه لانه يجنن وبعد اخذت لصديقتي نفس الاساس بس من درجات الالوان حقت السمر وطلع حلو ان شاء الله يعجب اللي تجربه ....نرجع للحبوب ...خلاص حطينا كريم الاساس واللي اتفقنا مايكون دهني ولا مايل للوردي عشان مايزيد المشكله ..وفي برضو كريم اساس من ماكس فاكتور يمدحونه الل يياخذ درجة لون البشره بكل جزء من الوجه للامانه ماجربته بس اتوقع يطلع حلو للوجه اللي فيه حبوب ..
اما بالنسبه للسمار .. ياقلبي عليه ..مافي احلى من السمرا وخصوصا لما تكون كلها ثقه بنفسها ... عمرك لاتحطين كريم اساس او بودره فاتحه عشان مايصير لونك رمادي وعمر مكياجك مايضبط... اذا تبغين تفتحين لونك اختاري درجه لون افتح منك بدرجه وحده بس مو اكثر عشان ماتطلع رقبتك او يدك لما تقربينها لوجهك لون ثاااني وبعيد... كل ماكان الشكل طبيعي طلعتي احلى ...والسمرا كثير الوان تناسبها درجات الترابي والعنابي والذهبي والمشمشي والموف ودرجات معينه من الاحمر تطلع حلوه عليها
لكن بالذات الاحمر والوردي لما تختارينهم اختاريهم بحرص لان لون ممكن يخليك ملكة جمال ولون ممكن يخلي لونك قاتم او بشرتك صفرا
او بالنسبه لتغير اللون فبعض الاماكن للي لون بشرتها حنطي او بيضا .. فانا اعتقد صراحه انه مو مشكله كبيره زي منطقة الابط مثلا .. يعني اظن مجرد انك تهتمين بازالة الشعر من هالمنطقه باستمرار واستخدام الليمون والجلسرين فالفتره اللي تشتغلين فيها وانك لما تتحممين تهتمين انك تحطين مزيلات عرق مناسبه لك بروايح حلوه ومافي مشكله لو حطيتي كريم اساس خفيف فهالمنطقه ...وخلاص ..ماهي نهاية الكون لاصار الابط غامق ولا يمنعك تلبسين بلوزه انتي حابتها اهم شي الريحه الحلوه ونعومة البشره تغطي على كل الالوان ..تتوقعين زوجك بيفضل أيش اكثر ؟؟ تكونين نظيفه وناعمه وريحتك حلوه ولابسه بلوزه ولا احلى بدون كم ومره شكلك انثوي مع اسمرار فالابط.. ولا بيفضل بلوزه نص كم او كم طويل كل يوم كل يوم مع عطر على هالبلوزه وخلصنا؟
بالنسبه للنعومه ... اكيد اول شي ازالة الشعر من الجسم كله .. بالله كيف بتدلعين وانتي مخبيه الشعر اللي طلع فساقك وخايفه يلمس بالغلط كوعك الخشن ... ولا خايفه يلمس كف يدك ويلقاه متقطع وخشن سواء بسبب الغسيل والشغل او الاهمال ! اكيد مابيكون عندك ثقه انك تقعدين جنبه براحتك بس مو بعد انك تدلعين وهذا مو لان عندك مشاكل مستعصيه ولا قبيحه لأ.. لازم تعترفين انك عجازه وبس ... ومع الايام مع الميانه والتعود على الزوج واول مايروح الحيا .. بتصيرين ماتهتمين ان شاف ساقك بشعر ولا شاف شعرك منفوش ولا لمس جسمك وهو خشن ... ولاتقولين بطل يحبني زي اول او خلاص مل مني او الكلمه اللي دايم نقولها لانفسنا انك مهمها تزينتي بيمل منك خلاص وتبهتين بعينه... غريبه؟؟ ... لان ببساطه الزين محد يمل منه... لكن انتي تقنعين نفسك بهالشي بالقوه لحد ماتصدقينه... لكن اتحدى اذا كان زوجك يشوفك احلى بنظره بعد شهر اذا كنتي تتنزينين ثلاث مرات بالاسبوع ... ويشوف حلاك اقل اذا تزينتي سبع مرات فالاسبوع ؟؟ هذا التفكير بقمة الغباء ... ماراح يمل دام زينك كل يوم بلون وشكل وشعرك كل شهرين ثلاث بقصه ولون ....اسعدي نفسك واسعديه وخلي ثقتك بنفسك كبيره ... انوثتك مصدرها ثقتك بنفسك والمرأه بهالزمن ثقتها اولا تجي من جمالها او بمعنى اصح اهتمامها بنفسها
نرجع لنعومة البشره ..
0 اول شي تهتمين تزيلين شعر جسمك شهريا بعد كل دوره واذا كان نموه سريع مرتين فالشهر ولا تتعيجزين مره لانك بتعيجزين دايم.. ومابيمر سنه الا والشعر اللي فجسمك خفيف بنسبة 50 فالميه لان البصيلات تضعف مع الاستمرار انك تشيلينها اول ماتطلع
0 كريم مرطب للجسم ويكون عطري وحلو على ذوق زوجك؟
عجزانه تدهنين جسمك كله ؟ بسيطه ياستي
من فتره ماهي قصيره جونسون نزلت سبراي بخاخ زيت ترشينه رشششش بس على جسمك بعد ماتتحممين ولا انعم يالعجازه ولا حتى البخ عجزانه عنه؟
بعدها دهني يدينك ورجولك وركبك واكواعك ماياخذ منك ثلاث دقايق بكريم معطر لو نفس ريحة عطرك يكون احسن وبخي فوق الكريم بخة عطر قبل يشربه الجسم عشان يثبت ومرطب حلو لوجهك وبتصيرين ولا انعم
0 اذا بشرة جسمك خشونتها مستعصيه بس قبل ماتتحممين افركي سيقانك وركبك ويدينك واكواعك بزيت زيتون مع سكر افركي بشكل دائري لحد ما يحمر الجلد شوي وبعدها بنفس اللحظه بتصيرين حرير كرريها كل اسبوع مره تجدد بشرتك وتنعمها وبتصيرين والحرير ينزلق على ساقك زي الدعايات ...
0 هنا ابي اقولكم عن جل جديد نوعا ما اللي متأكده منك ان الاغلبيه مايعرفونه هذا الجل يخلي البشره بدون مبالغه حرير حرير حرير .. تدهنينه على يدك او صدرك او رقبتك او وجهك او أي مكان تبغينه اول شي هو ماينمسح يعني اقصد مايبلل الملابس او لو تمسحينه بكلينكس مايبلل .. مو قادره اوصفه زين لان قوام الجل غريب وماتتشربه البشره بس يعطي نعومه ولمعه طبيعيه تجنن وكله كوم ولما تحطين فوقه شوي بودره لماعه لؤلؤيه او ذهبيه يطلع خياااااااااااااااااااالي اضمن لك تدمنين عليه ادمان وله استخدامات كثير
منها تثبيت كريم الاساس وينخلط مع الظل يخلي اللون يطلع مركز زي ماهو فالعلبه وبرضو يثبت حبوب الجليتر او اللمعه اللي تنحط فالصدر او الوجه او الكتوف .. انتي بس لما تشترينه بتلقين له استخدامات ايوه نسيت اقول بعد انه مخفي للتجاعيد واعتقد انه بيصير روعه اذا البشره فيها اثار لحب الشباب لانه يغلف البشره يخليها متساويه ولما تحطي اساس فوقه يطلع مره حلو المهم طولتها عليكم الجل هذا تلقينه برضو فمحلات وجوه اللي ذكرتها قبل كذا وهي مو موجوده بكل مدن المملكه للأسف ..وهو من ماركة سماش بوكس موجوده اعتقد فقط في محلات وجوه او فيسز وسعره 140 ريال واسمه فوتوفينيش ...ان شاء الله يعجبكم.. سعره غالي نوعا ما بس كميه صغيره مره منه تمدينها على مساحات كبيره يعني اقتصادي الا اذا كنتي بتتحممين فيه فيبغالك كل شهر واحد
0 وبرضو بقولكم على كريم اساس سبراي بخاخ وهذا السر اللي اكتشفناه فاحدى المنتديات ... وانا من زمان اقول ياربي مستحيل اللي يطلعون فالتلفزيون تكون بشراتهم خياليه كذا ولا نقطه ولا شعره ولا مسامه مفتوحه ولا أي حاجه ؟؟... المهم السر فبخاخ كريم اساس بس مخفف جدا جدا ترشينه على الذراعين والكتوف والظهر والسيقان والركب وكل مكان تبينه ... يلصق فالبشره ياخذ لونها يخفي كل شي علامات التمدد او السترتش مارك.. اللي تسمونها الخطوط البيضا ويخفي البقع والنقط وكل شي بس للاسف ماينباع فالدول العربيه بس في بنات فمنتدى معروف مادري اذا ينفع اكتب اسمه او لا يوصلونه وسعره رخيص جدا البخاخ الواحد ب25 ريال فقط وتوصيله ب25 يعني مايكلف عليك الا50 ريال بس مع فوايده بتدفعين فيه 500 وانتي مغمضه ... العيب الوحيد اللي فيه انو مافي منه درجات كثير .. في غامق للسود والسمر وبيج على ابيض وبيج على وردي وبرونزي اللي بشرتهم حنطيه او فاتحه مره ماينفع لهم ..بس صراحه مره حلو انا ومجموعه من البنات وصينا عليهم من فتره وصراحه يستاهلون التجربه.. يعني لو حبيتي تدلعين وتلبسين اقصر قميص نوم مع اضاءه حلوه ومع هالبخاخ بتصيرين زي بشرة الباربي لامسامات مفتوحه ولا لون اغمق وافتح ولا خطوط ولا أي شي والاحلى انه مايروح بسهوله ماينمسح يعني ..الا بصابون وفرك قوي ..وارجع اقول هو يخفي مايفتح اللون لاحظوا ...اظن الحين مع هالبخاخ اللي ممكن يخفيلك كل شي مضايقك فبشرتك بتصيرين فقمة الثقه والدلع وانتي لابسه القميص اللي فمزاجك بدون ماتنحرجين من أي شي ان شاء الله
طيب فرضا ماقتنعتي هههههه ولا ماقدرتي تجيبين لا الجل ولا البخاخ ولا الزيت ولا عندك استعداد تسوين أي شي لبشرتك التعبانه طيب وش اخبار فمك بكل ما احتواه من شفايف ولسان واسنان وصووت وهذا الفقره الاخيره لان اذا ماقتنعتي بشي منها لاتكملين قراءة موضوعي هههههه مابيك
اول شي يقابلك وانتي رايحه للفم الشفايف
أول مشكله يانها تكون صغيره يانها تكون كبيره صح؟
طيب لو كانت صغيره ..
ممكن ترسمين بمحدد الشفايف خط شفايف وهمي خارج الحدود الاصليه بس لازم يكون لون المحدد نفس درجة الروج تماما عشان يضبط وبيطلع حلو بعد ماتتمرنين على وضعه
0 القلوس او الملمع من اكثر الاشياء اللي تكبر الشفايف وتحليها وحسب ما اسمع انه جذاب جدا ا واكيد فهمكم كفايه.. فيه منه انواع والوان واشكال وانا عن نفسي جربت ماركات كثير ... لكن والله والله مالقيت القلوس اللي زي اللي اشوفه فالصور والتلفزيون اللي يخلي شفايفك زي القزاز مليانه ومنفوخه وتلمع ومافيها خطوط الشفايف الا فماركة فور ايفر عندهم ألوان مدمررره تجنن بدرجات روعه الوان الوردي والمشمشي والاحمر وغيره وغيره فيه بقلتر وبدون يجي زي العصار يعني ماتحطينه بفرشه زي القلوسات العاديه هو زي ماقلت عصار وفيه فتحه صغيره من فوق تضغطينه وتاخذين بفرشه من عندك ماله فرشه بس يجنن يجنن وسعره خمسين وحاجه .. وعندهم برضو قلوسات بروائح الفواكه جدا رووعه بالوان روعه ولماعه بس ريحتها شي رهيب ؟ وبرضو في فمحلات مكياجي المعروفه قلوسات حلوه
0 بالنسبه لتشققات الشفايف في فنكتار وبرضو عند بودي شوب مرطبات قويه وحلوه بالفواكه وزبدة الكاكاو وبعد كويسه تدهنين فيها الشفايف
0 اما بالنسبه للتصغير .. فاول شي ماتستخدمين الوان غامقه .. الالوان الترابيه واللحميه تناسبك كثير والافضل ماتستخدمين قلوسات لانها تزيد حجم الشفايف ..والمحدد اللي بارز ولونه قوي ومو ممزوج فالروج مايناسبك لانه يركز النظر على حجم الشفايف ..والمفروض تنبسطين بصراحه لان الموضه هالسنتين الشفايف الكبيره العالم تحقن سليكون وانتي رباااني ابسط ياعم...ولو انا منك احط اطلق قلوس ولايهمني واكبرها زياده ههههه
بس زي ماتفقنا لازم تكونين انتي اللي معجبك هالشي ومرتاحه عشان تدلعين وانتي كلك ثقه
0 اما اذا كان لون شفايفك غامق او محدده شفايفك رباني بلون غامق فالحل انك تحطين طبقة كريم اساس على شفايفك قبل تحطين الروج عشان يعطي اللون اللي تبغينه
وغالبا لما تبغيت تشترين روج عاجبك لونه خوذي نفس اللون افتح بدرجه عشان مع شفايفك يطلع اللون اللي تبين ..
0 وطبعا عشان يطلع الروج حلو لابس تكونين شايله الوبر اللي فوق شفتك العليا او على الاقل مشقرته عشان تكتمل الانوثه <<لاحظوا اني ماقلت الشنب عشان ماجرح انوثتكم ههههه
خلصنا من الشفايف ولو ماقتنعتي خلينا نروح للأسنان
0 طبعا التسوس او اذا فه اسنان بارزه او مو مرتبه الاسنان فانتي بقمة الغباء اذا سكتي على نفسك لان جمالك وجهك مايكمل الا بابتسامتك وابتسامتك عمرها ماتصير مشرقه الا باسنان صحيه على الاقل ومرتبه ونظيفه لو ماكانت بيضا ثلج.. فلازم تكون اسنانك تمام التمام وماعندك تسوي ولو اطراف اسنانك مكسره روحي لدكتور اسنان كويس يسوي لك اياها لو طرفها مكسور او كان متسوس الحين في ماده يستخدمونها تعوض المفقود من اطراف السن ومو مكلفه كثير .. وطبعا اكيد اذا اسنانك يبغالها تقويم حتى لو عندك عشر عيال لازم تسوينها كفايه اللي راح من عمرك...واذا اسنانك تعبانه ركبي اسنان واذا لثتك فيها نزيف او التهابات لازم تتعالج مالها حل لانها بتتعب اسنانك وبتسويلك رائحه فالفم وانتي فغنى عن هالاشياء اتفقنا
0 طيب الحين ان شاء الله تكونين خلاص مافي تسوس مافي سن طالع سن نازل مافي سن مكسور .. نجي للنظافه الللي مافي مفر منها لاي انسان فكيف عاد فمرأه ومتزوجه وتبي تدلع ؟ فرشه ومعجون وخيط تنظيف اسنان + فحم تفركين فيه الاسنان كل كم يوم يشيلك الطبقه المتراكمه على الاسنان من بقايا الاكل تمام ويبيضها او ملح وهيل يطيب فمك ويبيض اسنانك... هذا بشكل شبه يومي ... والحين لازم تسوين تبييض اسنان اذا اسنانك صفرا او متاثره بالشاي والقهوه او لو كنتي لاسمح الله لاسمح الله ربي مبتليك فالتدخين .. واول كان غالي بس الحين الاعلانات ماليه الجرايد عن عروض تنظيف الاسنان وتبييضها من 50 ريال وانتي طالعه ل400 واكثر واكثر حسب اللي يناسب ميزانيتك..
وبعد الحين طايحين بطبقة البورسلان اللي يدهنون فيها الاسنان وتطلع لولو زي اللي مسوية اصاله نصري بيااض ناصح واسنان تلمع وابتسامه حلوه .. بس ماعندي فكره عن اسعاره
0 بالنسبه للسان تنظيفه يكون بالفرشه حقت الاسنان وفي فالصيدليه حاجه اسمها معلقة اللسان تنظفين فيها اللسان الصباح او بعد الاكل تتخلصين من البقايا او من مسببات رائحة الفم اللي تكون على اللسان ...وفي كثيرررر انواع غسولات فم ومضمضات بكل النكهات ..لكن سيمعت ان طعمها مش ولابد بالنسبه للطرف الاخر
وبرضو في بخاخات للفم فكل الماركات وممكن تلاقينها فالصيدليه تعطر الفم ... وطبعا مافي احسن من السواااك تنظفين اسنانك وتطيبين فمك فيه .. واذا غلبتي حبة هيل تمضغينها ولا حبوب مص مثقل بولو وغيرها تقوم فالواجب ... ولاعاد تجين تقولين فمي واسناني ؟؟
الحين بعد ما صارت نظيفه ومرتبه وريحة انفاسك حلوه بتقعدين جنب زوجك بكل ثقه وتبتسمين من كل قلبك بدون ماتلفين وجهك ولا تحطين يدك على فمك ولا تخافين تهمسين له من قريب ولا تقبلينه باي وقت او يقرب منك وتتهربين منه ولا تضطرين تقولين مافرشت اسناني ؟
وبالنسبه للزينه ... طايحين الحين بالكرستالات اللي تنحط على واحد من الاسنان الاماميه .. وطالعه حلوه على كثير بنات ممكن تحطينها من باب التغيرر والاحلى تكون صغيره ... سعر ها مع التركيب عند دكتور الاسنان ب400 واذا ماتبين ممكن تشترينها من محلات التجميل العاديه ب20 او 30 ريال تلصقينها وتشيلينها وقت ماتبين وتحلي لك فمك
انواع عرض الموضوع |
العرض العادي |
الانتقال إلى العرض المتطور |
الانتقال إلى العرض الشجري |