اخبي الشعر عن عينه اخاف انه يجـي يقـراه
اخاف اكدر احساسه بحزنٍ يكسـي احساسـي
دفنت الحزن في قبر الضلوع اللي بكت فرقـاه
واجر الآه بـحروفٍ بكت في صـدر كراسـي
دموع الشعر ،حرمان المعاني ، همهمات ، و آه
جمر هجر، ودموع فراقّ في حبري وقرطاسـي
انا بعت الخلايق كلها والنـاس لجـل رْضـاه
لأنه كان لي ربعي واهلـي وديرتـي وناسـي
احبه والله الشاهـد وهـذا البعـد مـا اقـواه
اكابر واتظاهر بالصبـر ليـن انكسـر باسـي
انا من لي بعد عينه ؟ انا ما ابغي سوى دنيـاه
ابيه بسيف وصله يطعن همومـي وهوجاسـي
بكى في داخلـي طفـلٍ بحبـه والوفـا ربـاه
انا وهذا الطفل عقبـه يتامـى واليتـم قاسـي
نسى قلبٍ جعلته خاتمٍ فـي خنصـره خـلاه ؟
نسى حبي؟ نسى قربي؟ نسى اللهفه بأنفاسي ؟
نسى ذيك العيون اللي تموت بطلعـة محيـاه ؟
نسى دافي عتابي والغرام الشامـخ الراسـي ؟
يقول القلب: لا تنساه واقول: شلون بس انساه!
انا وشلون ابنسى من غرامه تـاجٍ لراسـي ؟
هذاك اللي انا وانته يا قلبي لـي أمـر طعنـاه
هذاك اللي بنظره من عيونـه يَـورق يْباسـي
هذاك اللي تفز الروح ولهانـه علـى طريـاه
هذاك اللي بغيابه/ عن عيونـي أبعـد نعاسـي
ياليته يرجع ويرحم خفـوقٍ ذاب مـن فرقـاه
ياليته يرجع لقلبي ويحيـي مـوت احساسـي