إلا ياليل قلهـآ لي علام الكون فيني ضاق؟
علامة مارحم دمعي وأنا واقف على بابه؟
تـفـيـق حظوظ خلق الله وأنا حظي مـآ بعد فاق
تضيق همومي بصدري ولا ادري شالذي عابه؟
سهرت بليلي المظلم أفسر لهفة المشتاق
طلبت الهم يخاصمني لقيت إني من أحبابه
لقيت إن الزمن ظالم مثل موج البحر غراق
رماني في متاهاته وسكّر دوني أبوابه
كفاية يا زمان التيه كفاية لعبة الأشواق
كفاية ليه ما ترحم شبعنا هموم طلابه
شبعنا من الزمن ضيقه ...وصرنا للفرح عشاق
يذوقنا مرارة دوم علينا يرمي أسبابه
-{ عزيز النفس بالدنيا يعيش بهم ماينطاق
وذليل النفس يارب خطاه الهم ولا صابه }-
ولكن لو يطول الوقت وينثر همه الحرّاق
يجي يوم من الايام وكلن ياخذ حسابه
نضيق بهالزمن ضيقة ولا نذرف دموع شهاق
نضيق ونصبر ونكسر زمان طالت أنيابه
أنا ادري ما نهاب الموت ولا حتى نهاب فراق
نهاب الخالق الواحد ونرضى بكل ما جابه
أعيش اصبر على البلوى ولو هالكون فيني ضاق
أعيش الذيب في عمري ولا أرضى فوقي ذيابه...