بسم الله الرحمن الرحيم ..
اولا كل عام وأنتم بخير وسعاده ..
أنا مشكلتي راح أقسمها لقسمين :
القسم الاول : أنا خطبت في شهر شعبان والحمد لله لكن أخواني من ابوي زعلوا وتضايقوا وفي كل مره يطلعون عذر وأسباب ماهي منطقيه لزعلهم
قالوا ( ليه تزوج قبل أخوك اللي أكبر منك )
ياعالم اخوي اللي أكبر مني وهو أخوي من أبوي انسان رافض فكرة الزواج
انسان ماهمه الا كوره وانترنت وسفر ..
كيف أربط مصيري فيه ؟؟
بعدين قالوا ( ليه تخطب ولا قلت لأمنا " زوجة ابوي " )
وبعد فتره بدأ منهم " الاستفزاز بالكلام " والتحدث معي بطريقه فيها عصبيه وسخريه وأستهزاء فيني ويقولون : معك فلوس علشان تتزوج لاتورطنا !! لاينقص شي بعرسك وتفضحنا .. وين بتسكن حضرتك ؟؟ .. أهل زوجتك كيف هم ؟ .. كيف أمورهم !!
انا ماادري وش اسوي معهم !!!! احترت فيهم !
مفروض يفرحون لي ويباركون لي ويساعدوني ( رغم إني مش محتاج لهم الحمد لله أموري الماديه ممتازه جدا )
.......................
القسم الثاني من مشكلتي :
انا ممرض وخطيبتي ممرضه وهي معي بنفس المستشفى ..
وبعد ماخطبتها أخوانها فضحوني !!
انا أقول لكم كيف فضحوني ؟
مافيه أحد ماقالوا له ولا سألوه عني .. وصلت أنهم سألوا راعي البقاله اللي عند بيتي .. ويسألونه هم يتسلف من عندك يسدد ولا مايسدد ؟ وراحوا اسألوا كل اللي بالحي ؟
حتى البنقالي اللي يغسل سيارتي سألوه عني .. كيف هو ؟ يعطيك فلوس على غسيلك ولا لا ؟!!
الجيران كلهم عرفوا إني خطبت والسبب هم .. اسألوا عني جاري اللي قدامي وجيراننا اللي ورانا واللي جنبنا واللي بعيدين عننا
حتى أنهم حصلوا على أرقام اقارب لي ! ويتصلون عليهم ويسألونهم عني !!
وسألوا ناس والله العظيم ماأعرفهم معرفه ممتازه يعنى سطحيه
العالم كلها عرفت إني خاطب
انا مااقول ماهو من حقهم أنهم يسألون بالعكس حقهم
لكن في اسلوب وفيه مئة طريقه على السؤال
ماتسأل الجميع حتى راعي البقاله والبنقاليه واقاربي وجيراني وناس معرفتهم فيني سطحيه
اسأل لكن بعقل ماهو بالشكل هذا !!
والله العظيم يقابلوني ناس في الحي يسلمون علي ويسألوني : متى عرسك ؟
اقول لهم : كيف عرفتم ؟ لي اسبوع خاطب مسرع عرفتم
يقولون لي اهل زوجتك سألونا عنك امس !!!!!!
شي عجيب انا الحمد لله انسان عاقل ومتفهم لكن فيه اشياء ترفع الضغط
كأنهم مقللين مني او شاكين فيني !! رغم أنه سمعتي وعلاقتي مع الناس كلها ممتازه
الله يهدي الجميع
وأسف على الاطاله