عليكم السلام ورحمة الله وبركاته
هلا فيك أختي
أولاً يالغلا لاتعتبين على أخوانك وأخواتك بالمنتدى لأن كل شخص له ظروفه وعنده اللي يكفيه
بالنسبه لمشكلتك غاليتي فبكون معاك صريحه وأتمنى تتقبلي نصيحتي لك بصدر رحب وتعتبريها من أختك أو من صديقتك الصادقه معك
أختي الغاليه انتي بتقولي انك لما تكوني زعلانه ووزوجك يسألك عن السبب بتقولي مافي شيء وهو بالتالي بيسكت
شوفي يالغلا الرجال مو مثل الحرمه يجلس يسأل وينبش ولازم يعرف ليه انتي زعلانه الرجال سألك وانتي قطعتي عليه الطريق وقلتي مافيه شيء .. هو أخذها من باب ان فعلاً مافيه شيء يستاهل وانك ماتبين تكبرين السالفه فأنهى الموضوع ..طبعا بالنسبه لك هي ماانتهت وكنتي تتمنين انو يسألك مره ثانيه ويلح عليك
لكن للأسف هذا الشيء مو عند كثير من رجالنا يالغلا.. لكن كان المفروض عليك دام في نفسك
شيء انك بينتيه له بكل هدوء وبطريقة عتب محب وشفتي رد زوجك وش بيكون ..!!
بالنسبه انو يروح لأهله أو يعزمهم فهذا شيء من حقه وكمان من حقه عليك الاحترام والطاعه لأن احترامك وطاعتك له بيفرض عليه احترامك وحبه الشديد لك
والله ياأختي الرجال من يشوف زوجته تحترمه وتحترم أهله وتكرمهم انها لو تطلبه روحه مايعزها عليها
لكن احنا يالحريم دائما ندور لأنفسنا الشقى ونضيع الفرص من ايدينا بطريقه غبيه جداً
عموما يالغلا انتي بكل صراحه أخطأتي في ردك عليه لأن فيه قسوه وعدم احترام له وكمان بالنسبه لأهله وبتعاملك القاسي معاهم وتهميشهم ..!!
أنا متأكده ان كلامي هذا بيضايقك لكن اذا تضايقتي منه تذكري لو زوجة أخوك طبقت نفس تصرفك هذا مع أهلك وش بتكون ردة فعلك ؟؟
والا لو زوجك همش أهلك أو ماشفتي منه احترام لهم أو شفتي منه تذمر أو كره لهم
بالله وش بتكون نظرتك له ؟ هل بيهمك لو هو زعلان أو راضي ؟؟
هل نظرتك له بتكون نظرة احترام وتقدير ؟؟ ما أتوقع ياغلاي
الا بتقولي في نفسك اللي مايحترم أهلي معناتو مايحبني ومدام كذا
معناتو مايستاهل الاحترام ولايستاهل اتعب نفسي عشانه ..!!
شوفي ياغلاي الله سبحانه وتعالى يقول : (إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ )
يعني ياغلاي غيري من تعاملك مع زوجك ابدي له الاحترام وتوددي له ثم بيني حبك له ولأي مخلوق يقرب له مهما كان في قلبك من أي شخص من أقاربه لاتجيبين طاريه الا بكل خير
وحاولي تتقربين من أهله وتتوددين لهم ابدي لزوجك ولأهله الاحترام لأن مهما كان حبك في قلبه
كبير الا انو مستحيل تكوني أغلى عنده من اهله لأن انتي بدالك كثير لكن اهله ماله بديل عنهم ..
اتمنى ياغلاي تفكري بعقل ولاتخلي العواطف أو الانانيه تخرب عليك حياتك
ربي يسهل أمورك وينور لك طريقك ويسخرلك زوجك ويسخرك له يااارب