[align=center]السلام عليكم ورحمة الله وبركاته[/align]
انا بنت عمري 20 سنة من الامارات, ملجت وصارلي (8شهور) وباقي على زواجي (شهرين فقط الله يتمم على خير ) خلال هذي الايام ايام الملجة (8شهور) ماعرف ليش ماعرف ارمس مع زوجي كله استحي يعني درجة اني استحي منه حتى كيف حالك ما اقوله, ومكالمتنا في اليوم الواحد مرة وحده ومدة المكالمة دقيقتين. واحس هو لايعة جبدة مني. انا اعرف ارمس مع الناس وافهم الناس وعندي اصدقاء واعرف انصح , لكن ماعرف ليش مع زوجي ماعرف اتكلم معاه و كله اتم ساكته لدرجة في ايام اتمر علينا ما يتصل فيه, وانا اهلي ما عندهم مانع اطلع معاه بروحنا طلعت معاه يمكن مرتين كان وايد ملل هو يحاول يتكلم معايه انا ارد عليه (هيه او لا )وبس واتم طول الوقت مستحيه ومبتسمة.
انا الي خايفة منه اني استمر على ها الحال الى بعد الزواج؟
انا اتمنى اعيش حياة المالجين وكل حد يقول احلى ايام ايام الملجة ياربومابا اتندم ليش ضيعت عليه هالايام كفاية الي ضيعته مب اشوية, انا يالسة ألوم عمري هل انا مسويه شي غلط في حياتي الله يعاقبني ولا شو سالفتي
"على فكرة والله انا في حياتي ما كلمت شباب في التلفون ولا طلعت مع شباب ولا الي علاقة حب ولا لي علاقة مع اي شاب"
أدعولي يا نااس ان الله يوفق بينا ويجمعنا على خير (آمين )
والله اني احبه وااايد واحسه جزء مني بس خايفه اتلوع جبده مني ويتندم ليش اتزوجني ويتركني خايفه من المستقبل مب عارفة شو اسوي اتمنى تتطور علاقتي وياه اتمنى اكلمه في اليوم 10 مرات
كل حد ينصحني وكل حد يسبني وكل حد يساعدني بس ماعرف ليش مب قادرة اغير من عمري ..
اتمنى تدعولي واذا عندكم اي تعليق اتخبروني والله ان شاءالله بيسر اموري واموركم
اجمل تحياتي عازفة البيانو الاماراتية.. :)