تصبح وتمسي وترقد دون تسمعني
عوَدت قلبك على هجري ونسياني
انته تعمَدت بغيابك تقاطعنــــي
وانته تسببت في همَي وأحزانــــي
صبرت بس الصبر ما كان ينفعني
ومليت من الانتظار وبعدك اشقاني
يا ماتمنيت شوفك وانت تمنعنـــي
وانته تجاهلت احاسيسي ووجداني
لا تعتذر فالعذر ماعاد يقنعنـــي
من عقب ما ذقت من صد وحرماني
أنا اتحداك اذا تقدر ترجعنــــي
أو انت تقدر على بعدني وهجرانـي
ماعاك لك أي دافع شوق يدفعني
من عقب ما انته تبيع بأرخص اثماني
بالحيل عانيت من بعدك ولوعنـي
جرَب عذاب الفراق ويمكن تعانــي
لا لا تحاول وابعد روح طاوعني
ولا تفكر انك تعود لدنيتي ثانـي
ماعاد حبك ولا شوفك يــولعنــي
أنا نسيتك وأطلب منك تنسـاني