حياتي زوجتي ..:: جديد ::..

السلام عليكم ورحمة الله وبركاته

يااعضاء المنتدى الحلو كيف حالكم وش اخباركم ؟؟

انا الحقيقه فتحت هالموضع علشان القى حل لمشكلتي الي اتعبتني مره وقلت مالي الا اسئل اهل الخبره عن هالموضوع .

يا جماعه الخير انا متزوج تقريبا من سنتين والحمدلله حياتي الزوجية حلوه وهذا بفضل الله صحيح كانت اول حياتنا الزوجيه غامضه شوي لكن مع الوقت تطورت علاقتنا وصرنا متفاهمين لابعد الحدود وصرنا كذلك صريحين لابعد الحدود .

تقريبا بعد سنه من زواجنا والحمدلله كانت علاقتنا تزداد تفاهم وود لكن لاتخلو حياة زوجية من مشاكل واشياء تعكر صفوه العيش وهذا امر طبيعي .
في يوم من الايام او بالاصح قبل فتره بسيطه صرحت لي زوجتي بأمر وقع على قلبي كالصاعقه وهو انها في يوم من الايام كانت بيننا مشكله انا وهي وطلبت مني انها تجلس ببيت اهلها علشان ترتاح شوي مثل كل الحريم وخلال هذي الفتره كانت زعلانه مني جدا وللأسف قررت قرار ارعن :crying: فكانت للأسف الشديد على علاقه بشاب تكلمه وتقابله قبل الزواج او بالاصح ايام المراهقه . فمع هذي المشكله الي حصلت بيننا رجعت واتصلت على ذاك الشاب بعد فراق دام بينهم 5 سنوات وطلبت منه اللقاء وعلى الفور الشاب استجاب لها واخذها من بيت اهلها وجلست عنده ما يقارب الساعه او الساعه الا ربع وتخلل هذا اللقاء قبلات وكلام غزل بدون ما يكون فيه جماع او خلع ملابس. رجعت من هذا الشاب وهي تبكي بكاء مر وماكانت مصدقه بالي سوته ابدا راحت الايام وانا ما كنت اعرف شيء عن الموضوع فمثل ما قلت لكم اننا الحمدلله كل يوم تزداد علاقتنا حب وتفاهم وكل يوم تقول لي هي الله لا يحرمني منك وانك انت افضل واعز الناس على قلبي حتى اكثر من اهلي ومستحيل القى افضل منك وكانت دائما تقول لي سامحني على شيء سويته وتتضايق لين اتى اليوم الي طلبت منها تبين لي ليش تتضايق اذا طلبت مني اني اسامحها ؟ فقالت لي القصه المريره . انصدمت وطار عقلي لكن من شدة حبي لها ما قدرت اسوي شيء .
جلست ابكي بكاء ما بكيته من 20 سنه وحسيت اني مثل الطفل وجلست ابكي يومين كامله مو مصدق قصتها المريره مع اننا كنا مسافرين قبل قصتها سفره ومستانسين وكنا نمزح ونضحك وكل شيء . هي تحطمت وتندمت انها قالت لي والي ذبحها اكثر انها اول مره تشوفني بهالحاله جلست تبكي معي وتترجاني اسكت بس لا حياة لمن تنادي قلبي نزف الما . قالت لي اطلب مني اي شيء وانا مستعده اسويه لك اضربني اقتلني سو فيني اي شيء بس لا تبكي كذا لكن ما سويت فيها شيء لان الرسول صلى الله عليه وسلم ما ضرب امرأة قط . وجلست ابكي بكاء مرير وبحرقه قلب فجأة فقدت وعيها وطلبت لها الاسعاف بعد ما جاء الاسعاف وصحت من الغيبوبه حاولنا ننام ونامت هي بعد عناة. واول ما نامت رجعت لي الحاله الصعبه وبديت بالبكاء وللأسف سمعتني وهنا قررت قرار اصعب واشد من القرار السابق وهو ( الإنتحار) صحت من النوم على صوت بكائي ودخلت دورة المياه وطولت فيها وهنا دخل بقلبي الشك ليش طولت قمت على طول سألتها وش فيك قالت شوي واطلع وفعلا طلعت من الدوره ولقتني على نفس الحاله ابكي بالفراش ومسوده الدنيا بعيوني قالت خلاص اترتاح حبيبي انا بعد كم ساعه ابموت . هنا تغيرت وثرت وسألتها وش فيك ؟ وش اكلتي ؟ وش شربتي ؟ ما جاوبتني وعصبت عليها مره وغصبتها تتكلم وتبين انها اكلت 30 حب تقريبا محاولة الانتحار وعلى طول شلتها لدورة المياه علشان اسوي لها عمليه استفراغ كرمكم الله واتصلت على الاسعاف وطلبت منهم حل عاجل وقالوا لي خلها تشرب سوائل كثير وعلى طول على المستشفى وفعلا سويت لها حليب وشربت ماء زمزم وعلى طول على المستشفى علشان يسوون لها غسيل معده ونوموها عندهم وجلست معها لين طلعت .
وما زالت هي دامه ومتحسره على الي سوته كله وتقول لي اي شيء تبيه مستعده اسويه بس ترجع مكانتي عندك وثقتك الاولى.

فأنا محتار الحين ما ادري وش اسوي هل اطلقها او اخليها . الحقيقه البنت كل شيء فيها حلو والحمدلله والله شهاده اقولها ما قصرت معي بأي شيء وماليه عيني بشكل ما يمكن اتصوره وحتى ما اظن فيه بهالزمن بنت مثلها وتعاملها . تعاملها معي قمة بالروعه وتعاملها مع اهلي ومع الناس يعني من جد البنت كامله والكامل وجه الله . وهذا الي عور قلبي وحير عقلي ما اقدر استغني عنها وبنفس الوقت ما اقدر انسى الي سوته لي قبل شهور .

كتبت لكم قصتي المؤلمه علشان ابي منكم حل وتكفون لا تردوني تراني بحيره من امري .

وبالله التوفيق

توقيع
اللهم احفظ لي زوجتي واجعلها قرة عين لي وبارك لي فيها واجمعني معها في جنت الفردوس برحمتك يا ارحـــم الراحــمـــيـــن
ج ـــلــنار ..:: نائبة المشرف العام ::..

عليكم السلام ورحمة الله وبركاته


أخوي الواضح من كلامك انك تبي زوجتك وماعندك أي استعداد لتركها


انا ما انكر انها ارتكبت أكبر غلطه في حياتها بمقابلتها لرجل آخر وارتكبت غلطه ثانيه انها

فضحت امرها واعترفت لك والله ستر عليها من قبل وكمان اركتبت إثم في محاولتها الانتحار

لكن أخوي مادام هي نادمه فإن شاء الله انها تابت لله توبه نصوح ومن تاب تاب الله عليه وغفرله

فإذا كان رب العزه والجلال وهو أقدر انه يعاقبها وينتقم منها يغفر ويتوب ,,

فكيف بعبد ضعيف ومن قوة ضعفه حبه الشديد لها مايغفر لها ويحاول ينسى هالمشكله اللي الشيطان

حطها في طريقكم عشان يفرق بها بينكم

انا ما انكر أن اللي حصل مو سهل عليك اخوي وانها بتقبى نقطه سوداء في حياتك وقدام عينك طول العمر


لكن أخوي مايضر انا نعيش ونستمر بوجود هذي النقطه ونحاول ماننظر لها ولا نتذكرها ولانذكرها

ووالله العظيم مع الوقت راح تنكمش وتصغر اذا احنا صغرناها وكبرنا عقولنا

أخوي بعض الرجال يغلط ويغلط غلطه كبيره واحيانا زوجته تكتشف غلطته بنفسها يعني تضبطه بالجرم

المشهود ومجرد ما ينكشف لها يندم ويتحسر ويتوب وزوجته تسامحه مو لأن مالها قلب أو ان الامر ماهمها

بالعكس لأنها تحبه فتضطر تصبر وتتناسى ومع الوقت تنسى وتصغر المشكله وتصير ماضي

فهذا اللي أشوف انك تسويه ,,, أخوي مادامت زوجتك تابت وانت رأيت الشيء هذا بنفسك

وانت تحبها وماتقدر تستغني عنها وهي تحبك فحرام تخرب حياتكم عشان غلطه شيطانيه وطيش

ندمت عليه زوجتك كثير الندم وحرام الحب ذا ينتهي لأن الشيطان يبغاه ينتهي

تعوذ بالله من الشيطان واطرد فكرة الطلاق من راسك وحاول تتناسى وماتذكر ولاتتذكر اللي حصل

وحتى زوجتك اطلبها ماتجيب طاريه واذا شفت انها صعبه في هالوقت خلي زوجتك تروح لأهلها فتره لين

نفسك تهدأ وبعدها عيش حياتك وان شاء الله ربي يهونها عليكم وتعيشون بأحسن حال

الله يوفقكم ويسعدكم ويبعد عنكم كيد الشيطان ياارب

اعتذر ع الاطاله

توقيع
سبحان الله وبحمده
♡ sαяσиα كبار الشخصيات

حسيت اني متابعه فيلم عجيب غريب وانا اقرا قصتك....!!
لاني ما اصدق ان فيه نساء ..
بقمة الغباء..
مع احترمي لحبك لزوجتك وتعلقك فيها..
تفضح نفسها ..
(إذا بليتم بالمعاصي فاستتروا)
وزوجتك مالقت تعترف الا لك..
الله يهديها ويصلحها..

كلام اميره رائع..
انصحك اقراه بتمعن..

واذا حاس انك محتاج ترجع ثقتك فيها ..
اعطيها فرصه واختبر وفائها..وامانتها,,
الواضح انك رجل ما قصرت معاها..
وفيك الخير..وتستحق زوجه تحفظك..بوجودك وغيابك..
واااااضح مقدار حبك..من توقيعك وكلامك..

الله ييسرلك..

توقيع
قد تكون للعالم شخصا ما..وقد تكون لشخص ما كل العالم
ديما13 ..:: عضو مميز ::..

زوجتك غريبه انها حكت لك

حتى لو ندمت او حتى تحبك المفترض ماتحكي لك

لانها ماتضمن ردت فعلك

ولانها راح تسيء لك وراح تتعب نفسيتك وتجرح كرامتك

حصل الي حصل

حاول تنسى

واطلب منها حتى هي تنسى

واذا قدرت على النسيان صدقني انت انسان قوي جدآآآآآآ

ماراح توقف حياتك بعد هالموقف على اي مشكله


اتمنى لك التوفيق

توقيع



عـطـر 7ــساس ..:: عضو مميز ::..

وانا رأيي مثل خواتي

هي غلطت الله يهديها المفروض خلاص ماتتكلم قدامك وتتوب ماترجع للي سوته بفتره المراهقه

المهم انت حاول تسوي نفسك قدامها نااسي وان شاءالله الامور تتصلح

الله يسعدكم ويبعد عنكم المشاكل

توقيع




يَدري { إنّ أسْبآب ضعْفِي " نَظرته " . .
يَدري { إنّي مآ أقأومْ . . " ضَحكتَه " . ~
يَدري { إنّ الْروُح ،. مآ تِغلى عَليه !.!
{لَو دَعآها } ،، جَت تلَبي ‘ دعْوتَه ‘
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

Powered by: vBulletin
 ©2000 - 2024, Enterprises Ltd.
المنتدى برعاية مميزون العرب للخدمات الرقمية
www.z777z.com
Adsense Management by Losha
( جميع مايكتب يعبر عن وجهة نظر كاتبه ولا يحمل وجهة نظر الموقع يعبر عن كاتبها فقط )
جميع الحقوق محفوظة زوجــي و زوجتــي عالم الحياة الزوجية
جميع الحقوق محفوظة زوجــي و زوجتــي عالم الحياة الزوجية