ما كل ضحكه تهز القلب يشبعها
* * * و ما كل دمعه تمر العين تبكيها

من شاف ضحكة زماني.. قال (بايعها)
* * * ما يدري إني فقيرٍ ما اقدر اشريها

ياللي نثرتي سنينٍ كنت اجمّعها
* * * تكفين هذي حصاد العمر لمّيها

كم كنت اهدد بك الدنيا وألوعها
* * * كل مااذكرتني .... واذكرها وانسيها..

بيدينك اللي أحس وكن أصابعها
* * * تقول بدري على الضيقة و طاريها

بعيونك اللي أناديها وأنا معها
* * * الله يا كم زعلتي يوم أناديها

كنت تحسبيني اسرح عن مدامعها
* * * وأنا مغير آتهجا رحلتي فيها


ايوالله اذكر عيونك يوم أطالعها
* * * اقرا بها انشودةٍ كنّا نغنيها


كانت تروح وتهج البال واتبعها
* * * تآخذ عيوني من الحزن وتوديها

لأيام كنت ارمي بدنياي واجدعها
* * * ايام ما كنت اكحلّها ولااعميها

طفلٍ سلاحه دموعه يوم يزرعها
* * * من فوق خده وكف ابوه يرضيها

اكبر همومه من دروسٍ يراجعها
* * * واقصى طموحه متى ينجح ويرميها

طفلٍ وكل أمنياته كان مطمعها
* * * يكبر وتكبر فتاةٍ كان يرجيها

كبَـرْت وكبْـرَت وضعت وخفت أضيعها
* * * خليت همي رضاها يوم أداريها

كل ما طعني زماني رحت أدلعها
* * * يوم الزمن ما تركلي غير أياديها

ما كنت أفكر تجي في يوم واسمعها
* * * تقلب حياتي من أعلاها لواطيها

حتى أقبلت تبكي الدمعه وتردعها
* * * ثم قالت وكن موتي بين اشافيها : ..

( جيتك احلّف عيونك قبل اودّعها
* * * ما اشوف دمعة عتبها لين اخلّيها)

تبغى تروح وتخليني واطاوعها
* * * تبغاني اسكت واقول الله يهديها

يا أول احلام روحٍ كان دافعها
* * * انك سندها وحاضرها وماضيها

يا سنيني اللي قضيت العمر اجمّعها
* * * يا ذكرياتي من أولها لتاليها

لا تتركيني أعيش العمر بايعها
* * * ضحكة زماني بدونك ما اقدر اشريها