حقوق الجار هي آخر شي تتوقع تحصل عليه من جيرانك في الوقت الحاضر ..
للأسف مافيه أدنى تقدير أو احترام لجيرتك .
اكره النظرة السوداوية للأمور وأنه الناس مافيها خير والخ الخ ..
لكن فعلاً الموضوع يحتاج وقفة مطوّلة !
كيف ناس يقدروا يعيشوا وهم مآذين خلق الله ؟
كيف ناس يقدروا يعيشوا وهم مآذين أقرب الناس لهم ومع أن الرسول موصّيهم فينا ؟
كيف ناس تلتزم بصلاتها وعباداتها وأمور دينها , و آخر من يهمها جيرانها ؟
ليش الجار صار عدو ويتعمد يرمي فضلاته قدام بيت جاره عشان واجهة بيته ماتكون وصخة ؟

ليش لما نقولك يا جار لو سمحت خلي الصغار يقصروا أصواتهم عندنا اختبارات ,
تعاند وتخليهم يصارخوا أكثر وتعلي صوت التلفزيون ؟
ليش لما ترمم بيتك , تزعجنا ليل نهار وفوق هذا كله
ترمي الاسمنت والحجر على حوش بيتنا ؟
ليش لما ترمم بيتك , تقول للعمال يحرقوا الزبالة في الحي,
وتأذي كل الجيران بالكربون وتكتمهم ؟
ليش يوميّاً ترسلولنا عيالكم فرض واجب يزعجونا ,
وانتوا عارفين أن ماعندنا أطفال قدهم ؟
ليش ياجاري في العمارة تولع الجمر قدام شقتي عشان تنبسط ع ” الشيشة “
كل يوم وانت عارف أن فيني ربو , وكل يوم أقوم مكتوم بنص الليل أتحسب عليك.
ليش ياجاري في العمارة , تصرخ وترقص بأي وقت بدون ماتراعي أني أداوم 8 ساعات
وأحتاج أنام بهدوء !
ليش ياجاري في العمارة , تحرمني أبسط حقوقي في الراحة
مع العلم أني أنا وياك ندفع نفس الايجار لراعي العمارة !
ليش ياجاري في السفر , تخلي عيالك تسرح وتمرح في ممرات الفندق في أي وقت
و ما كأن فيه ناس تبغى ترتاح ووراها بكرة خط سفر !
ليش ياجاري في السفر, تشوف عيالك يلعبوا بجرس غرفتنا.. يدقوا علينا الباب ويشردوا
وانت تضحك قدام التلفزيون و تقولهم ” اعقل ياولد ! ”
الى متى واحنا نعاني من أذيتكم وين مارحنا و وين ماصرنا ؟
الإسلام حفظ حقوق الجار ,حتى لو كان جارك كافر ما يجوز تأذيه
حرًم الإسلام أذى الجار ولو كان بأقل شئ من قول أو فعل
فـ الإيمان ينفى عن اللي يؤذي جاره !!
ناسيين حديث الرسول صلى الله عليه وسلم عن أبي هريرة رضي الله عنه :
« والله لا يؤمن والله لا يؤمن والله لا يؤمن قيل من يا رسول الله؟
قال الذي لا يأمن جاره بوائقه» متفق عليه.
و قصة المرأة اللي كانت تقوم الليل وتصوم بالنهار لكنها كانت تؤذي جيرانها
فقال رسول الله صلى الله عليه وسلم
«هي في النار «
يقول الرسول صلى الله عليه وسلم
« خير الأصحاب عند الله تعالى خيرهم لصاحبه وخير الجيران عند الله تعالى خيرهم لجاره >>
رواه الترمذي بإسناد حسن عن ابن عمر رضي الله عنهما
كل ماسويت شي تذكر وفكر بجيرانك , لا تحسّب أنك عايش بالدنيا لحالك ..
شيل همهم , اسأل عنهم ..
الجار من توصية الله سبحانه وتعالى ” والجار ذي القربى والجار الجنب والصاحب ذو الجنب ” النساء 36
الله يجعلنا من المحسنين لهم , والله يهديهم وايانا ..
وحدة كاتبة الموضوع وضغطها مرتفع مليون


"انه ملطووووووووووووش يااصدقائي"