ساعة في جو خالي من أيام العياد = والفياض يعط ريح النفل بحروفها
والدلال مساطره خاثر فيها القناد = والقصص والسامريه تشيل صفوفها
ناقتي ما تدخل السوق لو زاد المزاد = لوهل الربطات جتني تشيل أولوفها
لو يصبون الذهب صب والمهار متقاد = ما أرخص الإبل واختيار النفوس شفوفها
يحسبون الأرض خصبة قبل زرع وحصاد = السنين تسل فوق الرقاب سيوفها
ماصفت للأنبياء والملوك وقوم عاد = كم قصور شيدت وارجمت بسفوقها
الأناسه والهوى والمحبة والوداد = طاعة الله والمراجل قضبت شعوفها
ونستي ملحا من البوش غاربها سناد = فاهق سنامها ناشبن بردوفها
بالخضيرا راسها كنها تطرد جراد = يخزي الشيطان يوم العيون تشوفها
والأذاني بالنصاقر كما الشلف الحداد = افطس عرنونها ضافي غضروفها
ذيلها ابترخوش عذروب والعرقوب عاد = منشدت نداف قطن ايديها تحوفها
والعضود مشمره من مذكاها بعاد = يوم أحلى بباب عجلان بين كتوفها
كتفها عن وركها عشرة اشبار وكاد = والخفاف من الفحل والوصوف وصوفها
هضبة متحنطره دامس فيها السواد = قطعة من ليل تدفن يدك بدفوفها
ديرهٍ متنقلة من بلاد لبلاد = درها والذرا من صوفها
زاد من غابوا مديدة ولاقي البيت زاد = عاطفة من عاطفة ما تخيب أضيوفها
هي معاش أجدادنا والعصب والاقتصاد = أهلنا قد حسنت في الحياة أظروفها
ينطحك ربحه عبسها مثل ريح الزباد = كن مسك القيصرية بعث من جوفها
تقهر الأعدا نهار المزايد والعناد = كضمت من غبنها وصفقت بكفوفها