إسأليني عن جميع الناس إلا عن غلاتك
عن غلاتك يافلانه طالبك لاتسألين
لأن حبك في حياتي حدني لدرب الهلاك
كملي باقي القصيده لو بغيتي تعرفين
ماتوقعتك بعيني تاّخذي رتبة ملاك
وبدقايق في ودادك أختصرت عشرة سنين
الحلا لاجيت أعمه أكتشفت أنه حلاك
والغلا كلما أضمه ترتعش منه اليدين
كنت قبل أعرف طريقك وقبل مااتنفس هواك
لاطروا لي سيرة العشاق أضحك واستهين
صرت أشوف الشخص يبكي صحت ياأخي وش بلاك
وش علامك ضايق خلقك ومتكدر حزين
كان رده عقب صده وش تبي الله معاك
ياللي تجهل بالمحبه وبدروب العاشقين
كيف ماتبكي عيونك واللي حبيته نساك
كيف يتجرأ يخونك وانت عديته ضنين
لكن الشكوى على الله مبتداه بمنتهاك
ورغم اّلامك وجرحك ترتجي له كل زين
مرت أيام وليالي وانا سالي من سلاك
لين ماربي جمعنا وابتدينا مغرمين
أنتي لي ربي عطاني وأنا لك ربي عطاك
وكلنا صرنا عطيه من لدن رب معين
ماعذرت الناس إلايوم خوفني جفاك
وقلبي اللي كان قاسي ابتدا فجأه يلين
صرت ألخبط في حياتي وكل هذا من وراك
الغلط منك يجيني والأسف مني يحين
صدقيني في ثلاثه دام هذا الصدق جاك
وعقب مااذكر هالثلاثه موضروري تصدقين
صدقيني موت أحبك حب يتعدى سماك
صار حبك يجتذبني وصار قلبك لي كمين
وصدقيني عمر قلبي في الهوى ماكان شاك
في المحبه مايبالي دائم شكه يقين
وصدقيني لو خطيتي ببتسم واقبل خطاك
بس أمانه لو خطيت بحضرتك لاتزعلين
أنا لجلك باتعنى لأني أستاهل عناك
واحمل همومك بقلبي واتركك بس تفرحين
اّها منك .. ومن كلامك .. ومن دلالك .. ومن حياك
ماتضيع علومي إلا يوم أشوفك تستحين
كل بيت لك كتبته هو يحدد مستواك
وانك انتي في حياتي يالغلا تبقين مين ؟؟
أسألي عن كل الخلق الله وعن هذا واذك
بس رجاءا عن غلاك لا أشوفك تسألين
العرض العادي
