[align=center]ب[align=center]سم الله الرحمن الرحيم
بصراحة أنا عندي مشكله وما عندي احد يساعدني وينصحني ..
أرجوكم ما أريد لوم وعتاب نفسيتي تعبانه وايد وصايره وايد اتحسس من ابسط الأمور:111:
شوفوا أنا زوجة ثانية صار لنا نتزوجين 4 سنوات الحمدلله وعندنا طفلين
الحمدلله زوجي دايما يقولي أني غالية ع قلبه ويغبط نفسه أني زوجته وأني ما مقصرة فيه ولا فعياله ولا فالبيت والحمدلله حياتنا حلوه كل واحد يبذل جهده عشان يسعد الطرف الآخر ..
والحمدلله زوجي رجل دين ويحول يعدل بينا بس للأسف للحين ما حبنا انا وهي بعض وكل وحده فبيت وما نحب نشوف بعض!!
المشكله أنه زوجي هالصيف أخذها حق مكان هي وعيالها .. وهالمكان انا سبق وطلبته يوصلني له وقال هاصيف ما ينفع لأنه تعبان ويبغى يرتاح فما ناوي يطلعنا مكان بعيد ورح نكتفي بسياحة داخلية..
وصار لي من كم شهر أقوله يا حبيبي ودي ازور المكان الفلاني ويعيد لي نفس العذر..
وقبل اسبوعين جاني متضايق ومنعفس سألته شو فيك قال تعبان من الشغل وبعد ما اصريت فتح قلبه وقال "فلانه تريد تسير المكان الفلاني وأنا حاولت معها ما نسير بس هي مصرة وقالت لي أنها تعبانه من الدوام والعيال طفرانين ونريد نغير وزميلاتي يسافرن للخارج واهلي بعد وانت ما اطلعنا وما طلبتك شي وانا بسير بفلوسي إذا ما تقدر ..إلخ"
يعني زعلت عليه وسمعته كلام!
أنا وايد انجرحت لأنه زعل من زعلها ويفكر فكلامها انها تريد تطلع مع اني اصريت وطلبته وما اهتم بس خبيت حزني داخلي وحاولت اخفف عنه وطلبت منه يفكر عبالي بيتذكر اني انا طلبته قبلها وأنا الأحق وبكيت فغيابه بكي روح عيوني:111:
بعد يومين ايجى وقالي "حبيبتي بخبرك موضوع شوفي هالصيف بشل فلانه وعيالها المكان الفلاني وانتي وعيالك الصيف القادم"
تفاجئت:111:
قلتله"وإذا كنت ابغى هاصيف ؟
قال:"أوك بعد ما ارجع بوصلك أنتي"
يعني أنا كالعاده الثانيه
تعرفوا احسه دايما يحور الأمو عشان تكون هي الأولوية لها مثلا:
* في فتره نوموه فالمستشفى 3 مرات وفكل مره يطلع يسير عندها !!
المره الأولى قالي عشان أنه كان عندي اليوم قبل تنويمه فلما طلع سار عندها عشان انمشس ترتيب الأيام..
المره الثانية والثالثه قال بنمشي حسب الأيام الترتيب المعتاد فطلع عندها فالمرتين..
وفي مره مر بفترة مرض صعبة وعشان ما نختلف قال بيجلس فبيت والدته لحد ما يتعافى ونحن الثنتين نسيرله هناك زيارة، وبعد ما تعافى سار عندها الأسبوع الأول بحجة أنه بعده تعبان ومشتاقلي حييييل ويريد يكون عندي وهو احسن حالا !
وسافر فترة سياحه هو وربعه ولما رجع قالي "بسير عندهم لأن قبل ما اسافر كنت عندك وترا بس يوم واحد اصبري ما بتفرق عشان ما يصيرن مشكل ترا صحتي ما تسمح عالأقل أنتي راعيني هي إذا اصرت على رأي ما تقتنع بسرعة"
ترا أن اسكن فمنطقه بعيده عن اهلي بس يوصلني كل شهر زيارة وفي مره عشان ظروف الدراسة ما شفتهم شهرين وقلته" أبو فلان فديتك أبغى أزور أهلي هالخميس".. قال:"ماينفع فلانه مخبرتني قبلك تريد تسير هالخميس تزور زميله لها فالعمل فالمنطقة الفلانية ودامها طلبت هاليوم قبلك فهي الأحق انتي اصبري للأسبوع القادم"
طبعا كلمته بالطيب وحاولت اقنعه وبكيت وزعلت بس ما غير رأيه!!!!
والحين أنا طالبه اسافر ل هالمكان قبل بس ما اهتم وشلها هي الأول:111:
الحين هو من اسبوع مسافر وياها وبعيالها وأنا خلاني زيارة فبيت أهلي وكل يوم دموعي ع خدي طبعا من ورا اهلي ولا يراسلني وطرشت له كم مسج عتاب احاول احسسه أنه ظلمني وانا الأحق بهالصيف بس تخيلوا ما يد علي ويقولي ما وقت النقاش الحين لازم اصبر لحد ما يرجع وطلب مني ما اراسله لأنها تنزعج وتتنكدومافيه على عوار الراس والمشاكل..ارجوكم قولولي كيف اتصرف؟
هو بيجي الجمعه كيف الاقيه؟شو اقوله؟كيف لازم أكون؟ترا والله ما عارفه

"الفرق بينا ان وهي اني بعدني طالبه وصغيرة فالعمر وهي موظفه وطبعا الفرق في عدد الأطفال إذا بيساعدكم هالشي فتقديم النصيحه"[/align]