مساء الورد والفل والمسك....



اخواتي كيفكم؟؟؟ ياحبي لكم...

اخواتي؟؟ انا قبل اقولكم القصتين... بقولكم كلام من كل قلبي...ياليت ناخذه بعين الاعتبار..

اخواتي واخص الاخوات المتوظفات اللي عندهم راتب...واللي متزوجه....

مالكم بالطويله....

اخواتي؟؟؟ والله وبالله وتاالله ان الدنياء زايله وهذا من دون شك...لكن يااختي استغلي فلوسك بكفاله يتيم....يااختي الف ريال تكفلين بها يتيم سنويا....الف ريال بسنه بس..

وربي اجر كبببببببببببيييييييييييير... الرسول صلى الله عليه وسلم قال: انا وكافل اليتيم بالجنه... يااختي وش تبين غير كذا؟؟؟؟ الجنه مره وحده......

يااختي وربي منتي خسرانه 1000 ريال بالسنه....من 12 شهر طلعي الف واكفلي بها يتيم... صدقيني تاخذين اجر....


لان بعض الايتام وخاصه بالدول الافريقيه 1000 ريال هناك دبل وكثيره..منها يصرفون على اليتيم ومنها يدرسونه ... يااختي اذا درسوه بهذي 1000 يااختي تاخذين اجر على كل حرف تعلمه....تاخذين اجر على كل حرف يقراء به القران... يااختي بها الالف يتعلم الحديث والتوحيد والقران والتفسير والفقه.. راح تاخذين اجره....


صدقيني راس مالها 1000 ريال بالسنه...منتي خسرانه... الف ريال تضيع احيان بااغراض مالها داعي...

صدقيني وربي اني تحسفت على فلوس المكافاه حقت الكليه يوم تخرجت..تمنيت اني من خلال 4 سنوات كفلت يتيم...وربي تحسفت... فاانتي لاتحرمين روحك الاجر.....

شوفي القصه اللي سمعتها: القصه الاولى

يمكن غيري سمعها...

المهم في رجال من اهل الرياض دايم لما ينام يحلم حلم انه يشوف رجال من اهل القصيم يشوف انه من اهل الجنه وهو مايعرفه...

المهم في الحلم يجيه اسم الرجال وعنوانه بالكامل وعنوان بيته...

.المهم وهذا الرجال اللي من هل الرياض كل مره يتكرر معه الحلم...

ان الرجال اللي بالقصيم بيدخل الجنه...ويتكرر الحلم اكثر من مره.....

الرجال اللي بالرياض خاف.. قال لازم اسال الشيخ عن قصه هذا الحلم...

المهم سال شيخ... قاله الشيخ لازم تروح للقصيم وتروح لنفس العنوان اللي جاك بالحلم..
المهم الرجال سافر للقصيم...


ويوم وصل لها سال اهل المنطقه عن الحي والشارع واسم الرجال اللي في الروياء..المهم اهل القصيم دلوه على المكان والحي والشارع والبيت...


المهم ان هذا اللي من الرياض ابد مايعرف الرجال اللي يحلم به...ابد مايعرفه..الا بالحلم...
المهم سال الناس ودلوه على البيت..يقول دقيت الباب وطلع لي الرجال... وسلم عليه وقاله انت فلان الفلاني..


قال ايه وش تبي؟؟؟

قاله اللي من الرياض والله يااخوي انا مااعرفك ولاتعرفني لكن دايم احلم فيك...

احلم برجال اسمه زي اسمك وزي عنوانك وزي الحي اللي انت فيه.... قاله هذاك اللي من القصيم وش تحلم به؟؟؟ قال احلم انك من اهل الجنه.... الرجال اللي من القصيم...استغرب...

وساله هذاك اللي من اهل الرياض قال يااخوي انت وش تسوي وش تعمل....؟؟؟ رد عليه اللي بالقصيم..


.قال يااخوي جارنا توفى وترك عيال ايتام صغار وامهم...مالهم الا ربي...وانا كل مااخذ راتبي...اخلي نص الراتب لهم...


احط الفلوس بظرف وادخلها من تحت الباب.. واكتب على الظرف فاعل خير...... وربي هذي قصه سمعتها.....

القصه الثانيه؟؟؟

بنت تدرس في الكليه....اذا نزلت مكافاتها حطت 1000 ريال على جنب تكفل بها يتيم... يعني خلال 4 سنوات 4 الالف...

.كل سنه تدفع 1000 من المكافاه.....

وكانت تجيها شهاده اللي كافلته..شهاده اليتيم بالمدرسه...كان باافريقيا..وهي هنا بالسعوديه....


المهم تخرجت وسنت تخرجها توظفت حكومي في المنطقه اللي هي فيه.... وربي سمعتها الاسبوع اللي فات....


ياليت يااخواتي اللي تقدر تكفل يتيم....


صح نسيت اقولكم...انا قريت ان وحده دفعت 14 الف اجر شقه لااايتام وفقراء وربي فتح عليها وعطاه اللي تبي.....

يااختي وربي منتي خسرانه شي....راس مالها 1000 بالسنه اكفلي اليتيم..... وانتي يالمتزوجه شجعي زوجك على كفاله اليتيم...لاتقولين اخر الشهر مايبقى شي.... صدقيني الصدقه بركه في المال....انا ماقلت كل شهر....لا شهر بس واحد بالسنه..... او قسمي كل شهر طلعي لك مبلغ الين يجتمع لك اخر السنه





يااختي اذا كان عندك سفر او زواج.. تخلين زوجك يقتصد علشان يوفر لك المبلغ... ياليت يااختي تقتصدين عشان توفرين 1000 ريال لليتيم.... وربي وربي ماينفعنا الا اعمالنا الصالحه.....



ناس تخزن الفلوس تفكر بتدخل معها القبر.... اعوذ بالله من هالناس....يااختي مردي ومردك لقبر متر في متر ماراح يدخل معنا الا عملنا الصالح...ولاريال يدخل معنا ولارقم حساب....

ناس تغيرت حياتهم بعد الله ثم من كفاله اليتيم...



يااختي يالمتوظفه ويالمتزوجه لاتخلين قومت الصبح وروحه لدوام على لاشي....صح تكسبين فلوس...لكن الفلوس هذي وش سويتي فيها؟؟؟ لاتحرمين روحك الاجر..... الرسول يقول انا وكافل اليتيم بالجنه...وش غير هذا؟؟؟؟؟



صدقيني مابقى بالعمر كثر ماراح...يااختي في ناس اعوذ بالله تبيع ضمايرها علشان فلوس..وفي ناس تبيع الفلوس علشان رضى ربي.....


لايكون همك عماره ولا ارض بقدر مايكون همك كفاله يتيم ومساعده محتاج...

ياما ناس رواتبهم عااااااااااليه مره واخر الشهر مطفرين...ومافي فلوسم بركه..وراتبهم تطق العشرين الف وفوق....

تلاقين السياره اقساط البيت اجار...كل حياتهم سلف في سلف..وهم عندهم رواتب ضخمه...

وياما ناس رواتبهم حول 5 او 6 الاف..وماشاء الله افخم سياره وبيت ملك ويساعدون الناس.....

يااختي نصيحه مني لك...صدقيني وربي راح تشوفين الفرق لو تكفلين يتيم....

صدقيني ناس تتمنى تتوظف علشان تساعد المحتاجين....فلاتحرمين زوجك الاجر....


وش لتك يوم تكدسين هالفلوس بالبنك.. هل هي بتدخل معك القبر؟؟؟؟؟


في ناس تجي تقول انا اجمع لعيالي...اوكي اجمعي لعيالك..بس يااختي الف ريال ماتضر لو كفلتي بها يتيم....


وبعدين عيالك لو عطيتيهم دم قلبك..تاكدي ان رزقهم على رب العالمين....

ان كنتي تخافين ابوهم يموت... ومحد يصرف عليهم..تااكدي ان الله حي مايموت بيرزقهم زي مارزق هاجر وهي بوسط صحراء..

رزقها ماي الى وقتك هذا يمشي.... ورزق مريم بولد من غير زوج..... ليكون همك عيالك اكثر من الايتام.....


تذكري عائشه رضي الله عنها يوم جاتها الحرمه..عطتها التمره...وماعندها الا هي..... يااختي شجعي زوجك على اعمال الخير... لاتخلين الرحمه تنزع من قلبك علشان دراهم.... فكري بغيرك.... الدنياء رايحه...

وربي ماينفعنا لاماركه ولاساعه ولاشنطه ولاطقم الماس او ذهب.... الاعمال الصالحه هي اللي تنفعنا...

اصررفي فلوسك بااعمال الخير... مااقولك احرمي روحك اللبس..لا لكن فكري باالايتام..اكفلي لك يتيم..... والله في ناس اعوذبالله منهم على الريال تحاسب ولاتصدق ولاتزكي.... زي ماانتي مهتمه بان يكون لك رصيد في البنك حق الدنيا اهتمي وخلي لك رصيد باالاخره.....


اللهم يامالك الملك يامن لم يكن له ولد يامن ليس له شريك في الملك يامن لم يكن له ولي من الذل...

ياواحد يااحد يافرد ياصمد ان اللي تنوي تكفل يتيم يارب يارب يارب السموات والارض انك تعطيها اللي تبي عاجل غير اجل.. وانك تفتح لها ابواب رزقك...يارب العالمين

وان ياكريم ياعزيز ياالله يالله يالله انك تغير حياتها الى الافضل

وانك تجعل حياتها سعاده مابعدها شقاء..وفرح مابعده حزن ..وعافيه مابعدها مرض....ياسميع الدعاء...امين امين امين...


اتمنى انكم ترسلون موضوعي ايميل او تنقلونه للمنتدى ثاني..


ياليت يااخواتي اللي قرت موضوعي وهي قادره انها تكفل يتيم ياليت تكتب تحت علشان تشجع الاخوات...ياليت يالله من رقم 1؟؟؟ الخ