.
.
.

جرّبت في الدنيا تجاريب شايب
وعرفت عدواني وميّزت الاصحاب


وعرفت طبع الناس مخطي وصايب
ومانيب خبل(ن) تخدعه ضحكة الناب


جنّبت انا العالم وبعض القرايب
البعض منهم قربهم عقرب و دابّ


لو كان تعطيهم عيونك وهايب
ماينفعونك.. جودهم عند الاجناب


ناس(ن) يعادونك بليّا سبايب
حط الحواجز دونهم واغلق الباب


الا لمن جا لك مع الوقت تايب
فَ اصفح وربّك للمخاليق توّاب


واللي تكبر ؟؟ عنه شدّ الركايب
جَنّب طريقه واحقره كنه ذباب


و من لا يسد اللازمه بالنوايب
وقت الرخا تقول ابو زيد وذياب


بعض البشر قلبه من الحقد عايب
لافيه طب وقلبه اسود من غراب


عنده،، نجاحك من كبار المصايب
واذا سمع مدحك من الغيض ينصاب


لو لا الحيا سالت دموعه سكايب
مسكين من نار الحسد ماكل تراب


اللي يذمّك كل ماصرت غايب
وان جيت قدّم لك تراحيب واعجاب


كُبّه ترى مثله من الناس خايب
عادات ابو وجهين ،، يكذب ويغتاب


لو تغرقه بالطيب ماهوب طايب
ولاتنخدع في مثل شرواه لو طاب


يا كثرهم تفرّغوا للطلايب
ومابينهم قامت عداوات واحزاب


وتبقى الحقيقه يازمان العجايب
الرّوس روس ولو يغارون الاذناب

.. الشاعر / ناصر الدوسري ..


.
.
.


انتحار
%