تورتة عملتها لبنتى ..... - زوجــي و زوجتــي عالم الحياة الزوجية

احــــسآآس مرهف ..:: مشطوب العضوية ::..

السلام عليكم ورحمة الله وبركاته

التورتة دى عملتها لبنتى وعمرها سنة .. ودى طريقتها ...
تكفي 45 شخص .... اسرتى واسرت زوجى واصدقائنا المقربين اوى وبس ....

هى عبارة عن 4 كيكات مستطيلة ...
يعنى كمية المقادير مكررة اربع مرات....

المقادير

12 بيضة
10 كوب دقيق منخول .... دقيق المخبوزات
16 معلقة بكينج باودر
علبة فانيلا كاملة
4 كوب ماء دافي او حليب
4كوب زيت
8 كوب سكر

للتزين 3 كيلو كريم شانتى ...
مربي للحشو

فراولة 2 كيلو وكيوي كيلو
4 كوب شيكولا فورماسيلا للتزين الجوانب

الطريقة

اولا ..البيض مع السكر والزيت والفانيلا ونضرب كويس بالمضرب حتى يتجانس كويس جدااااا

ثانيا .. نخلط الدقيق مع الباودر كويس ...

ثالثا... نضيف خليط الدقيق وبالتبادل مع الماء او الحليب علي مقدار البيض والسكر اللي سبق وخلطناة ....

رابعا... نوزع المقادير بالتساوى في 4 صوانى مستطيلة ... وندخلها فرن علي درجة حرارة 180 درجة ... حتى تنضج ومانفتحش عليها غير لما ريحتها تملا البيت ....

خامسا انا طبعا حبيت اعمل التورتة علي شكل عروسة البحر ... الشخصية الكرتونية دى ... رسمت باترون ليها علي ورق زبدة وقسمت كل كيكة علي قطعة منهاااا

الذيل علي شكل ذيل سمكة
الراس اخدت كيكة كمان
الوسط اخد كيكة والصدر كمان كيكة ....

ماعد ماطلعنا الكيك خليناه يبرد وبعدين شقيتة من النص وحشيتة مربي فراولة

قصيت كل كيكة علي الشكل المطلوب منها

وكونت صورة عروسة البحر ....

وربطت بين اجزاء الكيك باعواد الشيش طاووق الكبيرة ...الخشب
(بحيث تكو واضحة وسهل نخرجها وقت الاكل او التقديم )

حطيت طبقة ومن الكريم شانتى ....علي العروسة كلهااااا
وبعدين زينت الذيل بالفراولة الشرايح والكيوى كأنة قشور السمكة ...
وزين الراس كمان بوردات وفستانها كأنة وردات لونها وردى ...
بأنى جبت كريم شانتى ابيض خلطة مع ماء كركدية مركز عشان يدينى اللون اللى عايزاة وزينت صدر العروسة .... ومن الجوانب زينتها بالشيكولا الفورماسيل ....كويس ....

ولان بنتى كانت مولودة في اول يناير كان الجو برد في مصر مااحتجت احطها بالتلاجة .....

وهتقولوا حطيتها علي صينية من فين ..!!
انا جبت لوحة فلين كويسة وقوية ... وغطيتها بالالمنيوم فويل كويس وكانت القاعدة اللي عملت عليها التورتة ... وقدمتهاا عليهااا

والتورتة زى ماقلتلكم كفت حوالي 45 شخص ... وجبت جمبها شوية جاتوهات وبسكوتات وبيتزا وحدات صغيرة اللي بنعملها دى كلكم عارفينهااا

وعصاير للاطفال وكاكاو بالحليب ونسكافية بالحليب للكبار ... وباتونسالية ..واطباق ملونة ومناديل ملونة وكااست تناسب المناسبة دى ....

حبيت اوريكم تجربتى لانى حبيت اعملها بنفسي وقتها لانى كنت سعيدة ببنتى اوى اوى ... اتمنى انى نقلتلكم تجربتى وان شاء الله تستفيدوا منهاااااا

اوريكم الصورة

ممكن مش واضحة كويس بس لانها كبيرة كان صعب اخدها بصورة وحدة ...

تحياتى ..