.
بسم الله الرحمن الرحيم

صباح الخير اخواتي

قمت الساعه خمسه يالله صباح خير.. وحسيت تسنه في شيء كابس على صدري وراسي مصدع الله لايوريكم

اكلت حبتين بنادول ومانفع قلت يابنت سوي لتس براد شاهي كود يتعدل المزاج شوي ويفك عنتس هاالصداع

مع انه الجو حلو جدا وشقشقة العصافير محليته اكثر... بس ماش شكل اختكم في الله ماهيب وجه اجواء حلوه

المهم قلت يابنت اسدحي موضوعتس دامتس فاضيه
موضوعي طويل شوي بس بيعجبتسن متآكده مافيها تسلام >>> ابوتس ياالثقه هع

اتمنى وكرما لاامرا اخواتي تقرونه لاخر سطر
والي مو فاضيه مو مشكله تخليه الين تفضى >>> ترى مهوب طايرن الموضوع جالس مرتز في ملفي

وهاالموضوع من زمان ودي اطرحه لانه موضوع كبير وخطير واشوف البعض متساهل فيه بشكل

باالفعل انا اشوفه خطير لانه يخص ركن من اركان الاسلام
ركن تساهل البعض فيه.. والله لو يدري البعض عن بعض المعلومات الخطيره عن هاالركن اهتز كيانه من هول ماعرف
موضوعي عن صلاتي وصلاتك ...!!

صلاتنا الي اول عمل سوف نحاسب عليه يوم العرض الاكبر
صلاتنا الي اذا صلحت صلحت جميع اعمالنا ...
طيب اول شيء بسآلكن اخواتي وش تعرفن عن الصلاه >>>> اكيد بتقولن وش فيها ذي قامت تخور

لا ياصويحباتي ماقمت اخور بس عندي شك واحساس واحساسي نادرا مايخيب دائم في محله >>> خلصينا عاد

عندي احساس كبير ان بعضكن ماتعرف كثير عن الصلاه

معليه تحملوني حبيباتي وخلوني اخبص واخور وبعدها احكمن

انا بقولك معلومات عن الصلاه :
طبعا تدرين ان الصلاه ثاني ركن من اركان الاسلام واهم الفرائض بعد شهادة أن لا إله إلا الله , وأن محمداً رسول الله

الصلاه عمود الإسلام، وناهيه عن الفحشاء والآثام،

من حفظها وحافظ عليها حفظ دينه، ومن غيرها ومن تركها وضيعها فهو لغيرها أضيع وأضيع
تدرين انه اول مايحاسب العبد عليه من اعماله كلها يوم القيامه هي الصلاه ...ان صلحت تيسرت باقي اعماله بمشيئة الله
ثبت عن رسول الله صلى الله عليه وسلم أنه قال :
( أول ما يحاسب عليه العبد يومالقيامة الصلاة، فإن صلحت صلح سائر عمله وإن فسدت فسد سائر عمله)

هل تعلمين اختي ان تارك الصلاه عمدا او جاحدها يستتاب ثلاثا فان لم يصلي يقتل

هل تعلمين اختي ان الفرق بيننا وبين الكفار والعهد الي بيننا وبينهم هي الصلاه .. من تركها فقد كفر

هل تعلمين اختي ان في الصلاه لذه وراحه للنفس لايستشعرها الا الخاشعين

نبي الله صلى الله عليه وسلم كان يقول: جعلت قرة عيني في الصلاة وكان يقول لمؤذنه: أرحنا يا بلال بالصلاة ولا يقول: أرحنا منها.

هل تعلمين اختي ان الزوجه الي زوجها مايصلي مايجوز تجلس في ذمته ..!

والي متساهل فيها يجب ان تنصحه ... وعليها اثم كبير جدا ان شافت زوجها متساهل في الصلاه وهي ساكته

هل تعلمين اختي انه اخر كلمات الرسول عليه افضل الصلاه في اخر خطبه له قبل وفاته بايام ... يوصي الناس وصيه

قال : أيها الناس ، الله الله في الصلاه ، الله الله في الصلاه

هل تعلمين اختي ان اول مافرضت الصلاه على نبينا عليه افضل السلام كانت خمسين ركعه في اليوم

وعندما عرج بالنبي صلى الله عليه وسلم إلى السماء أمر بخمسين صلاة ظل صلى الله عليه وسلم يتردد إلى ربه يسأله التخفيف لأمته
فيضع الله عزوجل بعد عشر ثم خمس حتى صار عددها خمس صلوات في اليوم والليلة .

طيب ذالحين عرفنا هاالمعلومات نجي لصلاتي وصلاتك

بسآلك اختي وغاليتي هاالسؤال واتمنى تجاوبين بكل صراحه

هل انتي راضيه عن صلاتك ...؟؟؟؟؟

ولا اقول خلاص لاتجاوبين وانا ماراح اجاوب لانه اكيد ثقيل الجواب ومخجل والله انه مخجل واؤكد على ذالك

حنا في زمن القابض على دينه كالقابض على جمره في زمن فرطنا وضيعنا وجنينا على انفسنا

نركض ورى الدنيا وشهواتها ونسينا انه ورانا آخره وحساب وعقاب الله المستعان

في زمن ضيعنا الصلاه ....واذا قمنا لها قمنا كسالى ...!!
فقال الله تعالى: (فخَلَفَ مِنْ بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ فَسَوْفَ يَلْقَوْن غَيّا )

والبعض والعياذ بالله مايصلي الا علشان يسكتون عنه الناس وهاذي حقيقه ..!!

وقد اخبرنا الله عن هؤلاء واسمهم المنافقين
المنافقون فإنهم يتكاسلون عنها، ذكر الله ذلك عنهم فقال تعالى:
( إِنَّ الْمُنَافِقِينَ يُخَادِعُونَ اللَّهَ وَهُوَ خَادِعُهُمْ وَإِذَا قَامُوا إِلَى الصَّلَاةِ قَامُوا كُسَالَى يُرَاءُونَ النَّاسَ وَلَا يَذْكُرُونَ اللَّهَ إِلَّا قَلِيلًا )

ويقول الإمام أحمد بن حنبل رحمه الله
يأتي على الناس زمان يصلون وهم لايصلون ,

وإني لأتخوف أن يكون الزمان هو هذا الزمان !!!!!!!

فماذا لوأتيت إلينا يا إمام لتنظر...........!

اخواتي اقسم بالله اني اشفق على من ضيعت الصلاه او تساهلت فيها ..

لاني اعرف انها ضاله وظالمه نفسها ويمكن ماتدرك خطورة تصرفها او جاهله وش تعني الصلاه...!
ايه يمكن جاهله ....... واتمنى ان هذا عذرها لانه ارحم من انها ناكره او جاحده للصلاه ...!!
طيب نجي لكيف نصلي ..!!
كيف تصلين كيف علاقتك مع الخشوع والتدبر في الصلاه ..؟؟؟

البعض صلاتها خفيفه سريعه كنقر االغراب ...!!

ايه شفتي كيف الغراب ينقر ...... صلاتها مثل كذا عشر دقايق وهي منتهيه... هذا اذا مهوب خمس دقايق

طيب بقول معلومه خطيره قسم يومني عرفتها حسيت ان الدنيا اظلمت بكبرها في عيني

مثلا تصلين الظهر اربع ركعات تدرين ان بعد تقييم صلاتك من الله يمكن ماتطلعين الا بركعه صحيحه من هااالاربع ركعات
هذا أبو هريرة رضي الله عنه يقول

إن الرجل ليصلي ستين سنة ولا تقبل منه صلاة,

فقيل له: كيف ذلك؟

فقال: لا يتم ركوعها ولا سجودها ولا قيامها ولا خشوعها

ويقول عمر بن الخطاب رضي الله عنه

إن الرجل ليشيب في الاسلام ولم يكمل لله ركعة واحدة

قيل: كيف يا أمير المؤمنين قال: لا يتم ركوعها ولاسجودها

واثناء الصلاه حدث ولاحرج

اثناء الصلاه تجهز لعرس فلان وتفكر في الفستان والاكسسوار وكيف تسوي شعرها وعلى ماتخلص صلاتها جهزت نفسها من الى

اثناء الصلاه تتهاوش مع فلانه ويتراضون ويصيرون اصدقاء

اثناء الصلاه تراجع نفسها وش شرت وش ماشرت من روحتها للسوق اليوم وكم صرفت

اثناء الصلاه تحاتي عيالها وزوجها وينهم وش يسوون وش اغديهم وش اعشيهم

ايه كل هذا يحصل اثناء الصلاه تجيبها الافكار وتوديها

يعني ماتجيها الافكار وحل المشاكل الا وقت الصلاه


كل الاحداث الي حصل معها في اليوم كله تتذكره في صلاتها ولا كىنها صلت للآسف
ماتدري وش قرآت وكم صلت..! وهل قرأت التشهد ولا لا.. هل سجدت مره او مرتين..؟

وطبعا ضاع الخشوع والتدبر ...... والبركه في هاالدنيا وشهواتها .. طبعا هي اولى باالتفكير ونضيع صلاتنا علشانها والعياذ بالله .!

اين نحن من الصحابي الجليل الذي وقف الطير عليه اثناء سجوده من شدة خشوعه في صلاته ..!!

اليس هذا بكافيي لكي نخجل من انفسنا ..!!

اهــ يارب ياكريم اسآلك بعفوك ان تبلغنا منازلهم برحمتك يااااارب
يقول الإمام الغزالي رحمه الله:
إن الرجل ليسجد السجدة يظن أنه تقرب بهاإلى الله سبحانه وتعالى,

ووالله لو وزع ذنب هذه السجدة على أهل بلدته لهلكوا،
سئل كيف ذلك؟؟؟ فقال: يسجد برأسه بين يدي مولاه,

وهو منشغل باللهو والمعاصي والشهوات وحب الدنيا

فأي سجدة هذه؟؟؟؟؟؟؟؟
اكيد البعض بيقول غصب عنا نفكر ...!
نحاول مانفكر بس مانقدر يجينا التفكير غصب ونسهى في الصلاه ونسرح لبعيد ..!!
اقول هنا تتجلى اسمى معاني الجهاد واعظمه ..جهاد النفس والتغلب عليها ..!!
حاولي وقاومي نفسك ... واكيييييد مع المحاوله راح تنجحين وتسيطرين على الوضع

البعض تصلي الفريضه فقط وتقوم كانه احد يطردها بدون ماتسنن ولا تسبيح ولاتهليل ولا دعاء
تصلي صلاه جرداء...!

صلاتها في هذه الحاله مثل الشخص الاجرد بدون ملابس كما اخبرنا الرسول عليه افضل السلام


والله يااخواتي اني اتعجب من صلاة البعض

تروح من عندنا على اساس تبغى تصلي خمس دقايق الا هي راجعه يقالها صلت

احيانا اصلي في اماكن عامه....... البعض صلاته والله مدري كيف بتواجه بها ربها... في نفسي اقول لو ماصلت ابرك لها

لاخشوع ولاسنه .... يعني باالعربي صلاه أي كلام ..!!

والبعض والله اني اخجل من صلاتها لما فيها من تدبر وخشوع ...وادعيلها ان الله يثبتها ..

البعض متساهلات جدا جدا في الصلاه ..وتآخرها عن وفتها

البعض ماتقوم تصلي الا وهي كسلانه وتقول ياليتني قد صليت وانتهيت ياربي من يقومني اصلي صارت الصلاه هم وثقل عليها
تسمع الآذان ولاكآنها سمعته .. او انها تقوم بتثاقل ويادوب رجولها تشيلها
ولو امر غير الصلاه.... تلقينها مثل الريشه من النشاط

البعض اذا جاء عندها عزيمه تآخر الصلاه الين تخلص شغلها الصلاه لاحقه عليها اما الشغل لا
المهم تطلع سفرتي وابيض الوجه ..والكل يمدخني بكره ويمدح شغلي .. والصلاه يابنت الحلال شوي نصلي لاحقين

البعض اذا عندها مناسبه او زواج وحطت المكياج وانتقظ وضوئها معقوله اخرب مكياجي واتوضأ من جديد

لا لا بجمع صلاتي اصليها بعد ماارجع
والبعض عاد متى ترجع يمكن قبل الفجر بشوي يادوب تلحق تصلي العشاء ..!

والبعض تنام واذا صحت صلت... يافلانه فاتتك الصلاه.. طيب نايمه راحت علي نومه وش اسوي

طيب لو موعد مهم سويتي حالة استنفار في البيت
تحذرينهم وتنبهينهم يصحونك .. غير انك موقته الجوال والخراشه علشان تصحيك لازم هذا موعد مهم او شغل مهم

اما الصلاه عادي لاحقين عليها صح .!

مره اتصلت على صديقتي وكانت نايمه وراحت عليها الصلاه

قلت ماصليتي قالت ذالحين بقوم اصلي قلت راح وقتها ..من زمان مصلين الناس

قالت لا ماخرج وقتها لان الصلاه يخرج وقتها بدخول وقت الصلاه لاخرى
قلت لاوالله ..... مالت عليتس من صديقه اقول نامي بس نامي

الصلاه لها وقت موقوت : ( إن الصلاة كانت على المؤمنين كتاباً موقوتا)

والبعض تنشغل في بيتها وعيالها ومنشغله في هاالحياه ... والصلاه الله يخلف

تصليها بعد خروج وقتها او تصليها بدون سنه وتسبيح او تصليها بسرعه يعني ابد مومهتمه نهائيا بامر الصلاه

وفيه نقطه مهمه :
طبعا تآخير صلاة العشاء جائز .... ولكن شرط بعدم خروج وقتها نصليها قبل انتصاف الليل
ولكن من هذا الباب صار البعض يآخر صلاة العشاء الى ان يخرج وقتها ...

وهذا غير جائز وقد حدد العلماء بخروج وقتها بساعه معينه هذا والله اعلم

وكان الرسول يفضل صلاتها في منتصف الليل.. وذات ليلة تأخر النبي صلى الله عليه وسلم بصلاة العشاء إلى قريب من منتصف الليل
فخرج عمر فقال : الصلاة يا رسول الله رقد النساء والصبيان . فخرج ورأسه يقطر يقول :
(لولا أن أشق على أمتي – أو على الناس – لأمرتهم بالصلاة هذه الساعة )

نجي لآخر نقطه وهي الوضوء والطهاره في الصلاه :

البعض تجلس على وضوء وتصلي ثلاث او اربع فروض بوضوء واحد طبعا اسهل لها واريح

طبعا مافيها شيء اذا ماانتقض وضوئها يجوز تصلي به اكثر من صلاه

بس لو تعلمين اختي وش فضل الوضوء كان توضيتي كل فريضه

الا تحبين اختي ان تكوني من الغر المحجلين...؟؟
الغر بالضم: جمع أغر، من الغرة وهي البياض في الوجه، والتحجيل: بياض القوائم من الأيدي والأقدام"


أما معنى غراً محجلين:

الغر: جمع "أغر" أي: ذوو غرة من السجود، أي من أثر السجود في الصلاة، قال تعالى: {سِيمَاهُمْ فِي وُجُوهِهِم مِّنْ أَثَرِ السُّجُودِ}

ومحجلون من الوضوء: أي من أثر وضوئهم في الدنيا،

قال رسول الله صلى الله عليه وسلم: ( من توضأ فأحسن الوضوء، وصلى ركعتين لم يسهفيهما غفر له ما قدم من ذنبه)

والطهاره فيه كثير متساهل في امرها واهم نقطه واوصي ونفسي والكل بها

اهم شيء التطهر من تطاير البول على البدن والملابس.

أن رسول الله صلى الله عليه وسلم مر بقبرين فقال إنها يعذبان وما يعذبان في كبير أما أحدهما فكان لا يستنزه من بوله )

وفى رواية ( كان لا يستتر من بوله )

فبمعني أنه لا يتوقى من البول أن ينال بدنه أو ثوبه

يعني يتعرض بدنه وثيابه للبول ولا يتوقى ذلك ولا يحرص أن يطهر بدنه وثوبه من البول، هذا معنى لا يستتر من بوله أو لا يتسنزه من بوله

وفيه نقطه عرفتها وكنت حاهلتها والله يجزى الي وعتني عليها خير الجزاء ويرزقها الجنه يارب وابغى اعلمكن بها يمكن فيه كثير يجهلها مثلي

وهي تخليل اصابع اليدين والرجلين اثناء الوضوء ...يجب إيصال الماء بين أصابع اليدين والرجلين

ادري طولت عليكن اخواتي مير السموحه منتسن

بس والله هاالموضوع يعني لي كثير واتمنى الكل يستفيد من موضوعي

وهذا كل مافي جعبتي عن الصلاه ...

واتمنى اتمنى اتمنى كل وحده تراجع نفسها بخصوص صلاتها ..!
ونصيحه من اعماق قلبي اذا هي مو راضيه عن صلاتها تلحق عمرها قبل فوات الاوان ..!!!
ابشرتسن تسنه خف الصداع يوم انجزت موضوعي