مرحبا بنات ..

اتمنى ان موضوعي يلاقي استحسان حضراتكم خخخخخخخخخخ
بنات انا دايم اشوف هذي المشاهد قدامي وبعضها يشعرني بالأشمئزاز ..
وبعضها بالتعجب ..

بس اللي اقوله وصلنا هذا القرن وفيه ناس كذا ؟؟؟؟؟؟؟؟؟؟؟؟؟؟؟؟

المشهد الأول ..

امرأه في كامل اناقتها تشوفينها تقولين يا سلام وش هالزين وش هالكشخه من لبس وشعر وريحه واكسسوارات بس (( لا تــــــضحك )) اذا ضحكت وش تشوفين اسنان صفراء عليها طبقات من الأكل والجير !!!

استغرب شلون تضحك عند زوجها وشلون تسولف معه وشلون يقدر ( يقبلها )!!!

وبعد هذا كله تقول زوجي ما يحب يبوس كثير !!!!
بلا مو منه من هالقرف اللي يشوفه ..
(( ناقشت مرة وحده في هذا الموضوع وش تتوقعون قالت لي ؟؟
تقول من الله خلقها ما فرشت اسنانها!!!
ردت اللي معها انا بس في المناسبات!!!))
وانا وجهي علامة تعجب كبيره !!!
في ناس كذا ؟؟


المشهد الثاني ..
طالعه مع زوجها وهو كاشخ على سنقه وعشره وهي طالعه بعبايه وسخه ما بقى كاتشاب ما بقى مايونيز ما بقى حليب من عيالها هذا اذا ردت على الأكل اذا ما كانت تمسح أنف طفلها فيه ( اعذروني بس مو مني من الحره )
واذا انفتحت العبايه تشوفينها طالعه بروب البيت !!!
بتقولون لي استر !!
انا ما اقول تتفسخ انا اقول تلبس عباية نظيفه و لبس طلعه مو لبس بيت!! تنورة وبلوزة محتشمه مثلا مو روب بيت !!

وبعدها تتشكى تقول زوجي يبصبص ما احب اطلع معه !!

المشهد الثالث ..
ام طالعه مع عيالها المول وتضرب في هذا وتسب هذاك ..
طيب تبين تربين عيالك مو في السوق عند الله وخلقه ربيهم في البيت ..
ابدا منظر غير حضاري..

المشهد الرابع ..
رايحه للصالون بتصبغ وتستشور ..
تفصخ العبايه .. الا جايه بالبيجامه !!!
طيب تعرفين تصبغين وتستشورين ما تعرفين تلبسين !!!

المشهد الخامس..
الريحه وما ادراك مالريحه ..
بنات انا والله احيانا امرض من ريحة العرق اللي في بعض الحريم ..
معقوله وصلنا الا هذا الزمن وما فيه وحده تعرف تستخدم مزيل رائحه العرق ؟؟
تخافين من الأمراض؟؟
فيه اختراع اسمه شبه /ليمون /مسك ..و و و

وبعدها تقول زوجي فيه برود جنسي!!
الله يكون في عونه المفروض يكون فيه اكثر اذا ما جاه الصداع النصفي والجيوب وخلل في الأعصاب ووظائف الكبد كويس !!

المشهد السادس..
تزورين ناس تلاقين البيت ريحته واصله الشارع الأطفال ملابسهم وسخه ريحتهم ما تقدرين تسلمين عليهم .. كنبهم كله بقع ..والساعه كم 9 مساء والعيال بالحوش يلعبون كورة والبنات متسدحين عند سبيس تون!!
وربي حتى ما تشتهين تشربين عندهم كاسة الموية !!
وتجيك هي تسلم عليك بحماس الا وريحتها كشنه وشعرها منفوش ( بس مشطته ع السريع وحطت كلبسه بس باين )

وبعدها تشتكي وتتحسب على زوجها تقول بس مقابل الاستراحه وما يجي الا وقت النوم ..
(زين انه يجي ينام بعد) يعني اذا هذا وضع البيت كيف يقدر الزوج يجي يرتاح ..
مش المفروض يكون البيت في هذي الساعه نظيق ومبخر والحرمة كاشخه ولابسه ومتعطرة والأطفال في سريرهم!!!
(( ناقشت وحده زي كذا في الموضع مع انه حساس بس ما قدرت اسكت قلت لها ليش طيب ما تنظفين البيت وتنظمين نوم الأطفال وتتفرغين لنفسك ولزوجك!! وش تتوقعون ردت؟؟
تقول اصلا هو ما يجلس في البيت علشان اسوي له كل هذا!! بالله ما ترفع الضغط؟؟))

يا الله وينكم عن النظافه اللي حثنا عليها الله ورسوله ؟؟
قال تعالى : " وثيابك فطَّهر "

ولا يكمل جمال الظاهر بغير النظافة، ولا يكمل صفاء الباطن وحسن المعاملة بغير تقوى ولطافة ..

فعن جابر بن عبد الله رضي الله عنها قال : " أتانا رسول الله صلى الله عليه وسلم فرأى رجلاً شعثاً قد تفرق شعره فقال : أما كان هذا يجد ما يسكن به شعره ؟ " ورأى رجلاً آخر وعليه ثياب وسخة فقال : " أما كان هذا يجد ما يغسل به ثوبه ".


اااه بس يا كثر المشاهد اللي ترفع الضغط بس هذا اللي يحظرني الحين وما فيه مانع من اضافة المشاهد اللي تساهم في رفع مستوى الوعي في النظافه ..انتظر ردودكم الحااااااااااااااااره