الى كل ام...

الى كل مربية اجيااااااال...

اين نحن من ابنائنا......؟؟؟؟؟؟!


اولادنا.....امااااااانة اعطانا الله اياها فهل حافظنا عليها ام ضيعناها..؟؟؟


يقول الرسول صلى الله عليه وسلم ((كلكم راع وكلكم مسئول عن رعيته، فالإمام راع ومسئول عن رعيته، والرجل راع في أهل بيته ومسئول عن رعتيه،والمرأة راعية في بيت زوجها ومسئولة عن رعيتها، والخادم راع في مال سيده ومسئول عن رعيته، وكلكم راع ومسئول عن رعيته

ويقول عليه افضل الصلاة والتسليم: "إذا مات ابن آدم انقطع عمله إلا من ثلاث: صدقةٍ جارية، وعلمٍ يُنْتَفع به، وولدٍ صالحٍ يدعو له"رواه مسلما
ونلاحظ ان من ثمار ماينفع الوالدين ومن ناتج تربيتهما بعد مماتهما الولد الصالح الذي يدعو لهما



اخواتي سأتكلم معكم من القلب للقلب وبلهجتي العامية لاني لاحظت ان الكثير من المواضيع
تطوى طي النسيان دون اي استفاده فلا اعلم هل المشكلة في المواضيع ام المشكلة فينا


ورسالتي هذه لكل ام

وقد صدق الشاعر حين قال:

ليس اليتيم من انتهى أبواه ــــــــ من هم الحياة وخلفاه ذليلاً

إن اليتيم من تلقى له أمًا ــــــــ تخلـت أو أبـًا مشغـولاً

والامومة ليست في الحمل والولادة فقط وانما هي بالتربية الحسنة
وهل اجر من حملت وولدت فقط... مثل اجر من ربت وعلمت وشقت لاخرج ابناءها على احسن صورة؟؟؟؟؟ بالطبع لا



عزيزتي الام...العولمة والانفتاح الخارجي على العالم من خلال الاعلام


والقنوات الهابطة والانترنت وجوالات البلوتوث افسدت اولادنا ومجتمعاتنا

كثرت الانحرافات بين الشباب الاولاد صارو كأنهم بنات ميوعة وشذوذ

واولاد آخرين انعدمت رجولتهم وشخصيتهم بسبب التحرش الجنسي بالمدارس

واماكن تجمع الشباب....



يا امهات بالله عليكم وش سويتو لعيالكم...؟؟؟؟

امنتولهم الاكل واللبس والالعاب وغيررررره من كمليات الحياة...!!

لكن هل اديتو واجبكم نحوهم ..؟؟ هل ربيناهم تربية اسلامية صحيحة..؟؟!



انا حديثي موجه لك يا ام....
لا تقولين زوجي غير متعاون.... وزوجي مهمل ....وزوجي مايدري عن بيته....
انا اقولك خلي زوجك على جنب

انتي ملكة البيت وانتي مدبرته وانتي اللي الله عطاك الحنية والعاطفة
والاحساس وعندك اشياء كثيرة ممكن الرجل يفوتها وتخفى عليه

اضرب لك مثااال ولدك اذا جاك من برا ومتضايق وحطيتي عينك
في عيونه...ماتحسين فيه؟؟؟؟
بينما الاب يبغاله فتره عشان يستوعب ان ولده فيه شي

اخواتي انا ماكتبت هالموضوع هذا الا وانا منصدمة من الي قاعده اشوفه
لان فيه كثير امهات مغيبات و مايدرون ايش اللي قاعد يصير
لذا حبيت يكون لنا دور كأمهات ومانسكت عن اللي قاعد يصير
لاننا كلنا محاسبين

تقولين وش بأيدي...؟؟؟

عزيزتي الام تعاااااااااااااااااالي نبدأ معاً






الطفل بين 3الى6 سنوات:

1- عودي ابنك على الاذكر الصباح والمساء وحفظيه صغار السور واستحيطي عليه دوما

2-عوديه ان يستر عورته وما احد يشوفه حتى اقرب الناس له وقولي له
هذا جسمك خاص فيك ولا تسمح لاحد يلمسك او انك تكشف عورتك عنده

3- راقبيه دائما وخلي عينك عليه يعني لا تخلينه مع الخدامة ابداااا حتى لو هي عسل
اذا طلع مع ابوه لا يغفل عنه ابداً وحتى ولو كانو مع ناس ثقات واذا جاءاسألي ولدك وين راح
وش سوا وحسسيه انه مهم بحياتك وانك فقدتيه

4- عوديه على الخشونه من يوم هو صغير(ومن شب على شي شاب عليه) يعني بعض الامهات الله يهديهن تعود ولدها على النعومة تقصه قصات غريبة...تلبسه لباس ملفت...تجمل ولدها بصورة ليطمع الذي في قلبه مرض

5- خليك معه صفحة مفتوحة اذا جاء الليل نامي بجنبه وحادثيه خليه يطلع اللي بقلبه
ويش يحب وايش يكره عشان يتعود من يوم هو صغير على الحوار والصراحة بينكم

6- اذا جلس عند التلفزيون اجلسي معه واذا سأل سؤال جاوبيه واشرحيله استفساراته
ولا تخلين ولدك يشاهد اشياء مخله قد تكون بنظرك عادية ولكنه ترسخ بمخه ولا عاد ينساها

7- لا تحرمينه من حنااااااانك قبليه واحتضنيه وحسسيه بحبك له عشان يكون عنده اشباع عاطفي

8- من اكبر الاخطاء تلبية رغبات الطفل المستمرة بشراء الالعاب....بالله عليك كيف بيكون عنده طموح وكل طلباته مجابه بالتأكيد رح يحس بالملل ومارح يحس بقيمة الاشياء لانها جته بدون جهد للحصول عليها






سن دخول المدرسة:

طبعا هذي فترة انتقاليه للولد اللي ماكان يطلع بدأ يطلع
واللي مايروح الا مع ابوه وامه الحين صار يروح لحاله
وهذي مرحلة للاعتماد على النفس واثبات الشخصية

1-عوديه على الصلاة والمحافظة عليها وذكريه بأهميتها لا تقولين صغير بالعكس الطفل اذا تعود على الصلاة وهو صغير خلاص لا يمكن يتركاها الانها بتكون من اولوياته اللي تعود عليها

2-مثل ما قلنا قبل ذكري ولدك بأن جسمه ملك له ولا يحق لاي احد ان يلمسه في مناطق حساسة حتى ولو كان مازحا

3- نصيحة لا تتركين ولدك يروح مع السائق لأي مشوار ولا تتساهلين بالامر معظم الانحرافات بدأت من السائق وان كان ولا بد يكون عندكم سائق مع زوجته...او يروح مع مجموعة

4- اذا جاء من المدرسه اسأليه عن يومه وكيف قضاه وخليه يعطيك رأيه في الطلاب والمدرسين والمدرسة ككل خليه يطلع اللي بنفسه واللي مضايقه

5- اذا كان يروح للمدرسة بدون سيارة فالوضع اهم خصوصا اذا كان البيت بعيد
فلازم احد يرافقه وماتخلونه يروح لحاله وياما شفنا من تحرشات بسبب الاهمال
و الطفل بهالمرحلة فرحان بالحرية وانه يقدر يروح ويجي بدون اهله
فنلقاهم دايم بالشارع يلعبون...يتضاربون...واحيانا يتفرجون على الرايح والجاي

6- عوديه على الصراحة وحتى ولو جا واعترفلك بغلط او تصرف سواه بالمدرسة لا تعاقبينه وتصرخين وتولولين ..هذا اكبر خطأ ...فهميه بغلطه وقولي له انا بسامحك اذا وعدتني انها ماتكرر..

7- خليك على اتصال دائم بالمدرسة ناقشيهم وقوليلهم ملاحظاتك سواء على الطلاب او المدرسين
واهم شي تستفسرين عن سلوك ابنك داخل المدرسة

8-عوديه على تحمل المسئولية والاعتماد على نفسة اعطيه مهمات يسويها بالبيت اذا طلعتو بالسيارة خليه ينزل للبقاله ويجيب حاجاتكم...او يطلب لكم من المطعم...خوذي رأية بترتيب البيت...بالاكل....خليه يعاونك بالمطبخ...اذا رحتي للسوق وحبيتي تشترين حاجه معينه استشيريه وخوذي رأيه بكل شي...اذا كان عنده اخوان صغار خليه ييلعبهم يهتم فيهم...يوكلهم....يلبسهم...لا تهمشينه بكلمة انت مااااااااااتعرف..توك صغيرررر....بالعكس خليه يفخر بنفسة وانه صلح شي مفيد

9-اعطيه مساحة من الحرية تحت رقابتك اذا كان عنده ميول للانترنت ليش لا...حطي جهاز الكمبيوتر بمكان مكشوف للجميع بحيث انه ينبسط وينمي هواياته وبنفس الوقت يكون تحت نظرك

10- نقطة مهمه وهي انك تسجلين ولد بحلقات تحفيظ وهذي اللي تخلي الولد من صغره يتعود على الرفقة الصالحة ومجالس الذكر

11- ابداً ابداً ابدً لا تخلين ابنك يطلع في الشارع الا للصلاة او المدرسة ويكون برفقة ابوه.... حتى ولو كان يلعب مع اولاد الجيران ولو لزم يكون اللعب في بيتكم

12- خصصي لابنك مصروف يومي او شهري بدون بذخ لانه من غير المعقول ان يعطى طفل 10 ريال يومياً مع الفسحة..وكثير نشوف اطفال يرمون فسحتهم ويبذرون فلوسهم على شوكلاته وغيرها من اطعمة غير صحية





مرحلة المتوسط والثانوي:



طبعا هذي المرحلة من اخطر المراحل
الولد في مرحلة بلوغ وتغيرات جسدية ونفسية......والاحاسيس تكون متضاربة
ومشوشه فتجدينه بلحظة مبسوط وبلحظة معصب لذلك لازم نراعي هالشي وماننصدم ونتحلى بالصبر



1- لازم نعرف ان فيه فئة من الشباب غير سويين وهؤلاء موجودين في مدارسنا وبين اولادنا
لذلك يجب ننتبه لسلوك ابناءنا في مرحلة المتوسط وننبهم مجددا لسلوك بعض الشباب المنحرف
طبعا بهالمرحلة اغلب الاولاد عندهم خلفية بسيطة عن ماهية التحرش فالامر رح يسهل علينا

2- اذا اخطأ حاولي بقدر الامكان ان تتحلي بالصبر لانه مثل ماقلنا عواطف الولد بهالسن مضطربة..وسلوكة فيه نوع من الاندفاع...لذلك خلي اعصبك باااااااردة قدر المستطاع وماتنفعلين

3- اذا اخطأ ابنك بخطأ لا يسكت عنه فهميه خطأه وعاقبيه بحرمانه من طلعة....لعبة...مصروف ولا تتهاونين بالامر اما اذا كان الخطأ غير مقصود او بسيط بأمكانك ان تنبهينه برفق وحب على الوعد انه مايكرر الغلط

4- الحقيه برفقة صالحة ...حلقات تحفيظ...مراكز صيفية معروفه...خليه يجالس الرجال ابوه... خواله اعمامه...عشان يتعلم الرجولة ويكتسب ويستفيد منهم ومن خبراتهم بالحياة

5- دائما ذكريه بالله....بالصلاة....بقراءة القرآن ....بالصدقة...وكوني قدوة حسنة له بأفعالك

6- شاركيه هواياته العبي معه....امزحي معه...سوي فيه مقالب...قبليه وامسحي على راسه بحنان.. سبحان الله بعض الامهات كأنها في ادارة اوامر وبس والتكشيرة على طول وهذا اللي يخلي الابناء ينفرون من اهلهم...ويدورون الاهتمام بمكان ثاني

7- في مرحلة الثانوي لا تحسسين ابنك بأهمية السيارة وفهميه انها وسيلة وليست هدف لان الكثير من الشباب عندهم هوس بالسيارات الا في حال ان الولد ثقة وماعنده ميول بعض الشباب من تفحيط وغيره

8- الرقابة...ثم الرقابة....لا تغفلين عن ابنك ابد...ولا تتركينه لحاله فترات طويله...يعني لا تطلعون
لمشوار وتخلونه 4 او 5 ساعات..خليك بجنبه على طوووول لحد ماتعدي هالمرحلة على خير

9-اطلعو مع بعض رحلات عائلية... اذا كان عنده صحبة صالحة خليه يعزمهم في البيت او يطلع معهم برفقة شخص كبير لان التضييق على الولد يجعله ينفر وتسير النتائج عكسية وينفر... فلا ضرر ولاضرار

10- الدعاء ثم الدعاء ثم الدعاء...ادعيله في صلاتك وقيامك في سجودك اذا انتبهتي في جوف الليل
ادعيله بالهداية والصلاح والتوفيق وان يحفظه من شياطين الانس والجن اذا خرج قولي استودعتك الله الذي لا تضيع ودائعه
وذكريه بقول الرسول صلى الله عليه وسلم:عن ابن عباس رضي الله عنهما قال كنت خلف النبي صلى الله عليه وسلم يوما فقال ((يا غلام إني أعلمك كلمات احفظ الله يحفظك احفظ الله تجده تجاهك إذا سألت فاسأل الله وإذا استعنت فاستعن بالله واعلم أن الأمة لو اجتمعت على أن ينفعوك بشيء لم ينفعوك إلا بشيء قد كتبه الله لك وإن اجتمعوا على أن يضروك بشيء لم يضروك إلا بشيء قد كتبه الله عليك رفعت الأقلام وجفت الصحف)) رواه الترمذي



هذا وارجوا ان تسامحوني
أن اصبت فمن الله وان اخطأت فمن نفسي والشيطان

والصلاة والسلام على سيدنا محمد وعلى وآله وصحبة وسلم







منقووول للفائده وتبادل الخبرات مع الاخوات الكريمات ومداخلات الاخوه ارجو التفاعل