اسمحوا لي بالمواصلة :
عندما تحادثت مع احد الاعضاء الجدد في المنتدى وكان يتكلم معي ويسأل عن صحتي وعن دوامي واوضاعي
كنت على نيتي اللي بقلبي على لساني
وقتها قال كيف الادارة معك والمدرسة
قلت والله الحمد لله
تمام التمام
الادارة زي العسل
بس ياخي بعض المدراء اذا جيت تقولهم والله تعبان ومريض ماتنفع معهم
لازم تعطيهم ركبه >> كذبه يعني باللغة الدارجه
والا ترى مايفكونك
قال اها ماشاء الله عليك والله شكلك راعي ركب
وجلس يضحك
وانا ضحكت على كلامه
قلت لا والله مااحب الركب بس اذا اظطريت اعطيته ركبه اسدحه منها
قال طيب وهو يصدقك
قلت الحمد لله هوى طبعا
قاطعني بالحديث
طيب بصراحه بصراحه
قالها ضاحكا
انت مريض والا بس طفشان من الدوام ومافيك حيل عليه
قلت تبي الصراحه
صحيت من النوم وجسمي مكسر ومافيني شده على الدوام
قلت خليني اسحب سيفون اليوم الدنيا مي طايره
قال والله ماشاء الله عليك اخاف من كثر ماتسحب السيفونات يطيح السيفون بكبره وضحك
قلت لا اذا طاح فيه غيره بديل ههههه
قلي اوكي
سلم على المدير
لو كان عندي مديره مثله كان الشغله فله
قلت الله يرزقك بواحد مثله قول امين قال امين وضحك
وبعدها قال استأذن الحين ولي عودة
مر اليوم على خير
وفي اليوم الثاني
مشيت للمدرسة
وانا قبل دخولي لغرفة المدير قلت ياولد خليني اسدح له بوحده تطيحه من الكرسي
سلمت عليه
استقبلني بحرارة غير عاديه
هلا والله هلا بالاستاذ راكان
قلت هلا فيك
قال سلامات وش فيك غايب امس
قلت اوه خليها على ربك
ماارتحت امس
قال ليه عسى ماشر
وش حصل ؟
قلت جدتي توفت >> على فكرة هي متوفيه من زمان يعني ماكذبت عليه بس وقت اللزوم قلت اخبره ههههه
قال لاحول ولاقوة الا بالله
عظم الله اجرك
قلت الله يجزاك خير
قال واجب نروح لك البيت ونقدم واجب العزاء لك
قلت في خاطري يالله البلشه عز الله رحت وطي
بادرته مسرعا
لالا مايحتاج فيكم الخير والبركه المكان بعيد ومايحتاج تتعبوا انفسكم
قال طيب على راحتك
ماصدقت قال كذا
قلت طيب انا رايح للطابور تبي شي مني
قال الله يسلمك
وقبل خروجي من باب غرفة المدير
ناداني قلي استاذ راكان
قلت هلا
قال اذا ماعليك امر
قلت آمر
تروح للحمام الله يكرمك وتسحب السيفون حق الحمام >>> كان الحمام ملحق بغرفة المدير
قلت انت تبشر
واروح ولا اخذت في بالي قلت امر عادي
المهم طلعت من عنده وهو مبتسم ابتسامه غير عادية
وانا في الطابور
جاني الوكيل
سلم علي سلامات وش فيك امس غايب واعطيته القصة
قلي اسمع المدير قبل شوي يقولي اسأل راكان سحب السيفون حق الحمام والا لا ؟؟
هنا بالوقت هذا شكيت في الامر
ربطت السيفون بسيفون المنتدى ؟؟
قلت لايكون ؟؟؟؟
المهم رحت عند المدير مسوي فيها ابغى اوراق وقلت خليني اجس النبض
دخلت عنده
ووقف من الكرسي هلا والله هلا بالاستاذ راكان
قلت الله يحييك >> اول مرة يرحب فيني بهالشكل مرتين ورى بعض !!
قلي آمر وش تبي
لايكون مصدع
وجسمك مكسر
وودك تروح وتستأذن
وقتها !!
قلت والله الا انفضحنا
وناظرته وانا في قمة الاحراج
قلت احسك تلمح على شي من الصبح
قال اعوذ بالله ولو مافي شي
قلت حلفتك بالله تقول وش فيك
قال الحين طول هالوقت تسحب علي السيفون وتعطيني ركب من الصبح وانا مصدقك
قلت لايكون انت العضو اللي امس قابلته بالمنتدى !!
قال ايه انا دخلت من جهازي قلت خليني اشوف اشيك على الوضع
واشوفك ماشاء الله متسدح بالمنتدى ولا كأن عندك دوام
قلت والله تبي الصراحه
الواحد اذا كان صادق في كلامه ماتعطونه وجه
واذا اعطاكم مبرر غير صحيح قدرتوا ظرفه
انا اعترف اني اخطيت
بس عن جد امس ماقدرت اداوم
واما النت
عادي كنت منسدح على السرير ومشبك الجهاز يعني مايبي له قومه وشيل وحط
ناظر فيني
قال شوف
هالمره بعديها لك
ولو مرة ثانية تكررت ياويلك ياراعي الركب
اسمح لي راح اسحب عليك سيفون جامد وانت المسؤؤل
بعدها
ضحكت وضحك هو على الموقف
بس بجد كان موقف اخذت عبره ودرس منه
ماانساه طول عمري
وادركت انه مهما كان حبل الكذب طويل فلابد يجي اليوم الذي فيه يقطع تماما
وفي يوم من الايام
وانا رايح للتمرين > كرة قدم
في المساء
بجانب الاستاد الرياضي بمدينة جده
والطريق كان السيارات اللي تمر منه قليله
ناظرت في نصف الطريق
فأذا بي اشاهد شي
لاول مرة اشاهد مثله !!
حقا
الى الان اتذكره بكل احداثه ؟
يالله امعقول هذا الشي يحصل امامي !!
--------------------------------------------------------------------------------
عندما كنت متجه الى التمرين واثناء مروري بالطريق
وجدت شيئا امام عيني يقذف من سيارة صغيره في نصف الطريق
تدحرج قليلا ذلك المقذوف ولكن
وانا وصاحبي الذي معي في السيارة
تسمرنا بذهول
فركت عيناي ماهذا ؟؟
امعقول !!
نظرت بعمق بشده اقتربت اكثر
فصدمنا جميعا بما شاهدنا
كان ذلك الشي المقذوف وكأنه كره
لم يكن
سوى امرأة في العقد الثالث او تزيد الى نصفه
تلبس عباءة كتف
وشعرها قد شل منه مايغطيه
اتذكر شعرها الاصفر ( الاشقر جيدا )
لااخفيكم قد تمعنت النظر فيها
قلت في قرارة نفسي
لربما تكون غير انسي ( جني ) بسم الله علينا وعليكم
ولكنني وجدتها امرأة نعم من جلدة بني البشر
بيضاء البشرة
شقراء الشعر
ويغطي وجهها المساحيق !!
كانت تتأوه كثيرا من شد الالم والارتطام في الطريق
حمدت الله انه لم يكن في ذلك اليوم مباراة في الاستاد الرياضي فلربما تلتهمها السيارات من كثرة انتشارها
اصدقكم القول
اصبحت متبلدا في مشاعري
مدري وش اسوي
وهي تصرخ وتمسك برجلها
اصدقكم القول كان منظرها مؤلم جدا
انكشفت ساقها وبانت ركبتها
فكانت ركبتها لوحة خاصه بحد ذاتها
قد جلد اللحم من عليها وغطت الدماء يدها
وكانت تثني رجلها بطريقه مريبه
اقتربنا عندها
حاولنا نكلمها ولكنها كانت تصرخ من الالم
كيف لا
ونحن معشر الرجال نتألم من وخز الابر فما بالك الفتاة وهي تتألم هول الارتطام
هدأت قليلا
في اعتقادي ان الالم تمكن من جسدها الى ان اصبح الما ولكن بدون الم
نعم في بعض الجروح لا تشعر بها جسديا من شدتها ولكن تشعر بها نفسيا
ولربما حصل لها ذلك
كلمتها
اختي وش فيك ؟؟
مين سوى فيك كذا !!
لم تجب
الا بكلمة
ساعدوني
مقدر امشي !!
فعلا قد غابت الحركه عن عالمها
كانت تجلس بوضع انحناء وتمسك برجلها
وتردد الله لايوفقه الله لايوفقه
عندها اتصل صاحبي بالاسعاف
اصدقكم القول لم استطع حملها
لانها امرأة اولا
ولان اصابتها كانت بليغه
وبنفس الوقت خوفا من تضاعف الاصابة بحمل خاطىء
انتظرنا الى ان يحين موعد وصول الاسعاف
كلمتها
قلت لها انتي وش جابك هنا
منو اللي سوى فيك كذا
نظرت الينا والدمع يسقط من عينيها
لاادري
هل هو دمع الندم
ام هو دمع الالم
قالت بسرعه مااعرفه !!
يالله كم صدمنا من ذلك
ماتعرفه
ولا له علاقة بها
وتركب معه في المرتبة الاماميه !!
قلنا كيف ماتعرفيه
قالت ايه مااعرفه
اخذته مشوار
طيب اكملي
قالت ومادفعت له الفلوس
فغضب وقتها
وقلي قفلي بابك زين احسه مفتوح
وفعلا جيت فتحت الباب على اساس اني اقفله
فتحرك بقوة ورماني بوضع انا لم اكن على انتباه من حركته !!
بصراحه لم اصدق مقولة المشوار اللي تكلمت عنها
كلنا يعرف ويعلم
ان الفتاة عندما تريد ان تذهب الى مشوار توقف سيارة ليموزين
او على اقل الاحتمالات فرضا توقف سيارة خاصة
ولكن تركب في الخلف
لا قدام مع الراكب ؟؟؟
كانت المرأة غير خليجيه
ملامحها
وكذلك لهجتها
حاولنا بعد ذلك تقديم المساعدة لها
ولكن لم نستطع
حقا لم نستطع
الى ان جاء الاسعاف
وهي تخيلوا
لازالت في منتصف الطريق
فتحوا باب سيارتهم
اخرجوا منها السرير المتحرك
ووضعوا له الاسعاف الاولية
ولكنها كانت تتألم
كان واحد منهم يقول انتي وش جابك هنا ؟
قالت له نفس الحكاية اللي ذكرتها لنا
ولكن كان جريء جدا واجرء مني ومن صاحبي
قال والله شكله واحد لعب فيك وبعدها تبين انتي الفلوس ورماك مع الباب
كنت استغرب جرأته
ولكنه قالها
توقعت ان الفتاة سوف تدافع
تقول لا
حرام عليك لاتتهمني
ولكنها سكتت
وكأنه دق على الوتر الحساس !!
بعدها ركبت سيارة الاسعاف
وغادرت
وذهبنا الى التمرين
وكان موقفها لايغادرني تماما
يالله الهذه الدرجة فيه عقليات بهذا الشكل
يالله الهذه الدرجه فيه قلوب قاسيه بهذا الشكل !!
رحت للبيت وبعدها حاولت النوم ولكنها تتطاير قصتها في ذهني
وبدأت
ابرر ذلك الموقف
هل كانت صادقة
ام رجل الاسعاف كان اصدق !!
الى ان توصلت الى شي ما
ان الحقيقة قد غابت في مغيبها
مواقف كثيرة تمر علينا
ولكن بعضها نجهل فك الطلاسم عنها
وفي موقف اخر
لاانساه
ايام كنت ادرس بالجامعه
كان هناك طالب يدرس معنا بشرته سمراء قاتمه
كان رجل خلوق جدا
احببت التعامل معه
واحببت اصرارة على الدراسة
في يوم من الايام
ركبت مع صاحبي في سيارته الخاصه لنذهب الى الجامعه
كانت المحاضره موعدها في المساء
تنتهي على قرابة العاشرة مساء او اقل بقليل
اتجهنا الى السيارة
ركبت السيارة
كان زميلي السائق حركته مريبه
فجأة ونحن نمشي بالطريق
فأجاني بسؤال
وش رايك في الطالب الفلاني !!
قلت وش فيه
قلي وش رايك فيه
قلت والله ونعم الرجل مؤدب وخلوق
ثم بادرني بأبتسامه سخرية
قال تخيل وش قلي
قلت وش قلك !!
قال اعطيني رقم راكان وقتها ماكنت موجود
وخفت ان اعطيه وتزعل مني !!
بادرته قلت والله كان اعطيته عادي
قال أي عادي
تعرف ان مغثه
واخلاقه زفت
وراح تندم على انك تكلمه
انا بنفسي مااطيقه شلون انت تطيقه
قلت ياخي وليش تحكم عليه بهالشكل
هالانسان والله ماشفت منه الا كل خير
يكفيك وقت الصلاة على طول تلاقيه بمسجد الجامعه حتى المحاضرات يتأخر عنها عشان يصلى مو مثلنا صلاتنا سفري للاسف !!
المهم صاحبي يكيل له السباب
وانا ابرر له ان رجل خير ومحترم
وفجأة
وفجأة
وكان المكان مظلم
ماحسيت الا شي يشدني الى الخلف
نظرت الى السائق لقيته لاهي في سياقته
ارتعبت وش هذا ؟
وشوي الا شفت يدين محلقه فوق راسي بدون صوت
عندها قفزت من مكاني
واقول في نفسي بسم الله لايكون جني !!
وفجأة يصدر صوت ضحكات عاليه
اصدقكم القول
كنت في وضع متوتر كثير
وفجأة يصدر صاحبي السائق ضحكات اخرى
وينقشع الستار
ويناديني اللي بالخلف ماعرفتني ؟
انا سمير
اللي تحدث عنه السائق بكل سب وشتم
وقتها هدأت من روعي
وقلت وش جابك وكيف جيت
قال والله اندسيت تحت عند المراتب الخلفيه
واتفقنا انا وصاحبنا نسوي فيك مقلب
وبنفس الوقت بشوف وش تتكلم عني فيه !!!
يالله كان موقف تخيلت نفسي لو امطرته بالسباب والشتام
وتصبح هناك ضغينه بطلها صاحبي السائق ؟
الذي تقمص الدور
اصدقكم القول
كنت اضحك معهم وانا والله في داخلي في قمة الغضب على تصرف صاحبي الارعن في ذلك
وعند توصلينا الى سمير الى بيته
فجأة صاحبي يضحك قال والله سوينا فيك مقلب زين انك ماطبيت فيه
بادرته بكل ضجر
تبي الصراحه
قلي هات
قلت انت ماتستحي على وجهك
ولاعندك ذرة كرامه
وعيب اللي سويته
نظر لي مبلوها !!
ليه وش فيك قلبت
قلت انا ماحبيت ابين قدامه اني زعلان
لكن والله حركتك مب حركة رجال
شلون لو تكلمت عليه والا اخطيت وسببت مشكلة بيننا
قال ياخي لاتاخذ الامور بحساسيه
قلت والله انت اللي ماعندك احساس
كان مصرا انه ماسوى شي غلط
وانا مصر على انه غلط فاضح واضح
في الاخير قال زعلت من مقلب !!
قلت ياخي انا ماازعل من المقالب بس مو بهاذي الطريقة
ترضى اسوى فيك مقلب صدقني راح تزعل
قال والله ماازعل وبعدين على فكرة انا ماانصاد
يعني حريص وفهيم
قالها ضاحكا
عندها فقط اجزمت في قرارة نفسي اني اسوي فيه مقلب يقلب حياته راسا على عقب
وماكانت الا مجرد ايام ؟؟
وتحقق الوعد
فكان مقلب الى الان يتذكره ولن ينساه طول حياته
غير مجرى حياته 180 درجه
مقلب واي مقلب
تهون كل المقالب عنده !!عندما قام زميلي بتوصيلي الى البيت بعد المقلب اللي سواه فيني
وتحداني انه ذكي لااستطيع ان امسك عليه شي
كنت افكر واخطط
لكي ارد له ذاك المقلب والموقف المحرج اللي وضعني فيه وهو غير معترف انه وضعني في ذلك الموقف الذي من حقي ان اعتب عليه
دارت الايام
حتى خليته ينسى اني اخطط له مقلب يخليه يتوب ثاني مرة يسوي هالاشياء من جديد
كان زميلي يحكي لي مايحصل معه
كنا انا واياه ولازلنا كالكتاب المفتوح لبعضنا البعض
وفي احد الايام
او في ايام كثيرة لم يكن ذلك الشخص اللي اعرفه
كنا نذهب كل عصر الى الملعب نمارس لعبة كرة القدم
ولكنه اصبح لايحضر
او بمعنى اخر يقول جاني تشبع
لم تنطلي علي هذا المبرر فهو شغوف جدا بلعب الكره
اصريت عليه ضيقت الخناق الى ان اعترف لي بما به !!
يقول
عندي اختي تدرس في المرحلة الثانوية في احد المدارس
اوصلها يوميا الى المدرسة ومن ثم اقول في نهاية اليوم الدراسي بالرجوع اليها واوصلها الى البيت
استمريت على هذه الحاله فترة
وفي احد الايام وانا جالس في العصر اتجهز الى الذهاب للتمرين
رن جرس الهاتف
امسكت الهاتف ورديت كالعادة
الو
واذا بصوت انثوي مرتبك في الطرف الاخر
رديت مرة اخرى
الو
مين ؟؟
خرجت كلماتها بشكل خجول
الو انت محمد !!
قلت في نفسي لربما تكون من جماعتنا تريد امي او اختي
قلت نعم
مين انتي !!
عندها بدأ يتلاشى الحرج منها شيئا فشيئا
قالت انا وحده معجبة
عندها بدات علامات الاستفهام تقفز في مخيلتي
معجبة !!
قالت ايه
بادرتها مسرعا
وكأني انا في موضع البنت وهي في موضع الشاب
وشلون عرفتي رقمي
قالت بصراحه
انا معجبه فيك من زمان
قلت لها تعرفيني طيب !!
قالت ايه مو انت اخو فلانه اللي بالمدرسة الفلانية !!
عندها تفأجات
قلت وش عرفك
انتي تعرفي اختي
قالت لا مااعرفها
بس بصراحه
انا طالبه بنفس المدرسة
وكنت اشوفك لما توصل اختك وتجيبها
مدري شدتيني لك بطريقة غير طبيعيه
كان عندي اصرار اني اتعرف عليك
واصريت اني اخذ رقمك بشتي الطرق
وفعلا الحين انا قاعده اكلمك وماتتخيل كثر ايش
سعادتي اني اسمع صوتك
يقول صديقي انت تعرفني ياراكان انا والله مالي بسوالف الغزل
لكن البنت هاذي جابت راسي مدري كيف
يقول جلسنا فترة نكلم بعض
تعمقت العلاقات اكثر واكثر
ولكن كانت مشكلتها
انها لاتستطيع المكالمه الا في العصر عشان اهلها يكونوا مشغولين
وعشان كذا ماشفتني اروح الملعب هالايام
مدري اذا ماسمعت صوتها يوميا ماارتاح
عندها قلت
يالله وش هالدنيا بس
دنيا فيها العجايب
استمر صاحبي على حاله فترات من الزمن
لدرجة انه كان يقف عند باب بيتها في حي اخر
ويحادثها مباشرة وهو في الشارع !!
ادركت انه
اخينا في الله غرقان لشوشته
ولم يعد كما كان بالسابق
في احد الايام
اتصل علي ابن عم لي
غابت فترة اخباره
كان الوقت بعد الظهر وقبل العصر مباشرة
جلسنا نسولف
ونسولف
فجاة بادرني بالسؤال عن صديقي لانه يعرفه
اخبار محمد ياشيخ لي فترة عنه
قلت والله لاهي في هالدنيا
الولد علومه صارت ماتسر
قال خير
واخبرته بقصته
ضحك وقال والله غريبه ماتوقعته منه
الولد احسه مو راعي هالحركات
عندها قفزت في مخيلتي فكرة مجنونه
قلت اسمع
ابغاك في طلب قول تم
قال تم
قلت ابغاك تتصل عليه بعطيك رقمه وتبهذله بطريقه غير مباشرة
قال كيف ؟؟
قلت اتصل عليه وغير صوتك وسوي نفسك انك اخو البنت اللي تعرف عليها
وهدده !!
قال والله ابشر ماطلبت شي
فعلا وقتها ولد عمي كان يملك جهاز يسجل المكالمات
وفعلا
اعطيته رقمه
واتصل عليه بعد صلاة العصر
كان الشيخ محمد متجهز لمكالمة الفتاة
متمسر عند التلفون
وفجأة يتصل عليه ابن عمي
ولكن
لم اعرف ماذا حصل بينهم
الا عندما اتصل علي ابن عمي وهو غارق في الضحك
قلت خير وش سويت
قال ماراح اتكلم
بخليك تسمع المكالمه اللي سجلتها له
وفعلا فتح التسجيل وبدأت اسمع مكالمته
الو
رد عليه محمد هلا
قال له انت محمد !!
قال نعم
قال انت عارف تكلم مين
قله لا
قال ان اخو البنت اللي غرغرت فيها وتغازلها يانذل
ارتبك محمد لما قله كذا
جاء بيرد عليه بادرة ولده عمي بكلمات
قال انت مو رجال اعطيني ابوك اتفاهم معه ياورع
بادرة محمد بكل ارتباك
خلينا نتفاهم طيب
قال نتفاهم على ايش ها ؟
البنت ضيعت مستقبلها وخربت سمعتها
وتقول نتفاهم والله لأشوفك قدامي لاادعسك بالسيارة وافك الناس من شرك
ولعلمك بنات الناس مو لعبه بيدك
رد عليه محمد وزادت حدة الاضطراب عنده
ياخي هدي نفسك طيب
قال لا اعطيني ابوك خليني اتفاهم معه
شوف مامعاك حل الا انك تتزوج اختي وتجنبنا الفضايح
والا ترى بأخذ عمرك فهمت !!
عندها بدأ محمد في وضع لايحسد عليه
ياخي تكفى والله اني غلطت ومعترف لاتفضحنا
وانا لسى ماكلمت دراستي شلون افتح بيت !!
رد عليه ايه شلون تفتح بيت لكن تعرف تهدم بيوت يانذل !!
فجأة يبادره بالكلام اسمع ابي اقابلك الحين في المكان الفلاني
رد عليه صديقي ليه اقابلك !!
قال بتقابلني وغصب عليك والاترى بجيك البيت
ترى اعرف انت وين ساكن ؟؟
يالله عندها صديقي بدا في التوسلات ياخي مايصير خلاص قلنا اسفين
قال لأاسف ولاشي المهم قابلني في المكان الفلاني بتكون معاي سيارة فورد لونها عنابي واقفه هناك
معك نص ساعه لو ماجيت والله لاتلوم الا نفسك
جاء صديقي يتكلم طيب لحظة لحظة وقفل الخط ابن عمي
وانتهى التسجيل
قلي شرايك ؟؟
عندها انفجرت ضاحكا
يخرب عقلك وربي حبكتها وانطلت على المسكين
قال ايه الحين مواعده في المكان الفلاني المسكين ههههههه
وفجأة وانا اتكلم مع ولد عمي
اسمع صوت منبه السيارة ( بوري يعني ) معلق عليه بشكل مبالغ فيه
عرفت انه سيارة صديقي محمد
قلت ابن عمي اقولك الولد جاء عندي خليني اروح اشوف وش يبي
وفعلا طلعت له وهو في وضع مرتبك جدا جدا
قلت خير وش فيك معلق البوري
طلع من السيارة مسرعا
قال راكان الحقني الحقني
قلت خير >> مسوي نفسي ماادري بالسالفه
قال اخو البنت اتصل وعرف كل شي وهددني ويبيني اقابله الحين دبرني وش اسوي
انا زدت على الطين بله قلت يالله !!
الله يكون بعونك والله مصيبه من جد
شلون راح تفك نفسك منها
قال دبرني شلون
واثناء حديثنا
مر احد اصدقاءنا في الشارع سلم علينا
وشاف اخونا في الله مرتبك قال وش فيه عسى ماشر
قلت له بالسالفه
ناظر في صديقي
قال والله انها ورطه الله يكون بعونك من جد بتكون فضيحه
نظر له محمد كان بيأكله بعيونه من شدة النظرات
قال الحين بدل من تهدي فيني تزيدها علي !!
وانا اكتم الضحكات في نفسي وسويت نفسي اني متعاطف معه
انصرف صديقنا العابر
وبقيت انا ومحمد
قلي يالله تروح معاي
قلت وين ؟
قال يبيني اقابله !!
قلت والله لو تقطعني مابقي الا هي تنشبني معك !!
قال افا صديقك انا تتخلى عني
قلت انت اللي جبته لنفسك
شوي ومن شدة الارتباك يتصبب العرق منه بغزاره
مايدري وش يسوي
بصراحة حنيت عليه
لكن قلت في نفسي خليه يتأدب مرة ثانية مايسوي فينا المقالب ويقول عادي وانا ذكي محد يقدر يسوي لي شي
وقتها كانت ايام البيجرات موجوده
فجأة وهو معي يتكلم الا وجرس البيجر يرن
حط يده في جيبه مسرعا
ونظر الى الرقم
عندها بدأت حدة التوتر تزيد وتزيد
قال اسمع اخو البنت داق علي من رقم بيتهم
يالله الحين شكله يبي يقابلني
قلت كان الله في عونك والله
قال اعطيني التلفون حقكم بسرعه خليني اكلمه لايفضحني يروح يتصل على بيتنا وينشب في ابوي
قلت حاضر ولايهمك الحين اجيبه لك
وفعلا جبت له التلفون
اخذ الرقم
وكان يدق عليه
اصابعه ترتعش من الخوف
وفجأة يقول
الو
رد الطرف الاخر
الو بصوت انثوي
قال مين ؟؟
قالت انا ماعرفتني !!!
استغرب من انها هي اللي دقت عليه مو اخوها ؟؟
قال اخوك وينه !
قالت أي اخو ؟
قال اخوك اتصل علي يهددني اليوم وانه عرف بالعلاقة اللي بيني وبينك والحين يبيني اقابله عند مكان وصف لي
بادرته قالت اخوي ؟؟
وش فيك صاحي والا مجنون !!
اصلا اخواني كلهم صغار ومالهم بهالسوالف
معي اخوي الكبير بس مو هنا بالرياض هناك موظف وفين وفين يكلمنا
عندها قال طيب ومين هذا اللي اتصل علي وهددني وعارف علاقتي فيك !!
قالت والله مدري
والله وقتها ماقدرت اتمالك نفسي
انفجرت اضحك ضحك غير طبيعي على حاله
عندها ناظر فيني استغرب ضحكاتي
لكن عرف اني ورى هالمقلب
وقتها تنهد تنهده كبيره
قلها طيب خلاص اكلمك بعدين بتفاهم مع واحد الحين !!
قفل الخط
ناظر فيني بحقد
انت اللي مسوي هالحركه
من كثر مااضحك جلست على الارض
وهو يغلي من القهر
قلي يعني انت
رديت عليه قلت أيه انا ؟؟
عشان ثاني مرة ماتسوي مقالب في الناس وماتعترف فيها
تذكر ايام سمير !!
بادرني وقال الله يخرب بيت شيطانك وربي انك سويت فيني مقلب ماانساه طول عمري
ياخي لدرجة اني كنت بسويها على حالي
وانا استمريت في الضحك عليه
قال بسألك مين اللي ساعدك
قلت ولد عمي عبدالله
قال يالله وربي ماعرفت صوته
جرجرني في الكلام
وسجل صوتي
وقلت بنكر ان بيني وبين البنت علاقة لكن سجل محادثتي وقلي شوف انت اعترفت لي ولو تلعب بذيلك اسمعك المحادثه وفعلا سمعني وخلاني في وضع محرج
قلت ها وش رايك بس بالمقلب جامد صح
قلي أي جامد ياخي كنت بتاخذ روحي
قاعد اتخيل نفسي يكلم ابوي ويقوله بالسالفه
والله انه يقطعني تقطيع
وبعدها
جلسنا نضحك وتاب توبة انه يسوي لي مقلب مرة ثانية هههههههه
سبحان الله بعدها
تاب انه يكلم أي بنت مهما كانت وفعلا
له سنوات يذكرني يقولي تعرف راكان
اقسم بالله من يوم سويت فيني المقلب
كرهت المكالمات والمعاكسات وتبت منها
والحين شوف لي كم سنه والحمد لله تزوجت
وعقلت وهذا بسببك بعد الله بطريقة غير مباشرة خليتيني اصحى من اللي انا فيه !!
وهنا ادركت انه لربما الواحد فينا يعمل شي غير مقصود ويأثر في الطرف الاخر بطريقة كانت ايجابية او سلبيه ,,
استمرت الايام تتوالى
وفي صباح يوم اخر عندما كنت ادرس في الجامعه وكان عندنا اختبار نهائي
اتصل علي زميلي محمد عشان يروح معي
قلت له اوكي بعد شوي امر عليك جهز نفسك
قلي طيب انا في انتظارك لاتتأخر الاختبار لايروح علينا قلت لا مسافة الطريق بس !!
وفعلا
لبست الثوب والشماغ
وطلعت للسيارة
واثناء تسخيني للسيارة
نظرت في الطريق فأجد فيه سيارات كثيرة لم اعهد ذلك من قبل في شارعنا ؟؟
كنت حاط سيارتي في مكان مرتفع
وانا راجع بالسيارة ( ريوس ) عشان اعدل اتجاه السيارة على الطريق
فجأة سمعت صوت طرقات على الزجاج الامامي للراكب
نظرت بعمق
فوجدت فتاة لابسه عباءتها وعليها اللثام كانت تطرق زجاج نافذة السيارة
عندها وقفت
اصدقكم القول
تسمرت في مكاني !!
وفجأة وانا افتح زجاج السيارة
بادرت هي وفتحت باب السيارة ؟؟
وحصلت هناك
المفأجاة
مفأجاة لم تكن في الحسبان تماما ؟؟
يالله مالذي يحصل لي !!!
عندما فتحت تلك الفتاة باب سيارتي
كنت في وضع ذهول ؟؟
اسأل نفسي
ماذا تريد ؟
وفجأة قطعت حالة الصمت المطبق
بمقولة السلام عليكم
رديت عليها وعليكم السلام
قالت لوسمحت ممكن توصلنا الى الطريق العام
عندها نظرت الى الخلف فوجدت اربع بنات اخريات منتظرين ماذا اقول
وفعلا وافقت قلت تفضلوا اركبوا
فعلا ركبوا
ولكن ماشد انتباهي
ان هذه اللي كلمتني
ركبت معي في المقعدة الخلفيه
استغربت ذلك تماما !!
وقتها بكل امانه كنت افكر في الاختبار كثيرا
لان هذه المادة كانت مصيرية بالنسبه لي
وكان زميلي ينتظرني عشان نمشي سوا للجامعه
فعلا طلعوا البنات واحدة منهم صغيره لم تتجاوز العاشرة
وباقي البنات اعمارهم مابين 18 وال30 تقريبا
استغربت قلت في خاطري
طيب ليه ماتركب الصغيره قدام وهي ورى
المهم مشيت بالسيارة
والاحظ في المراية الخلفيه كوم السيارات اللي وراي
كانت السيارات منتظره منهم الاشارة لكي يتسابقوا على توصليهم
المهم
وانا بالطريق
كنت في وضع صامت تماما
اعدل في شماغي
والبس نظارتي الشمسية
فجأة بادرتني بالسؤال
انت وين رايح !!
استغربت سؤالها
ولكن قلت يالله خليني اجاوب
قلت رايح الجامعه
ردت علي مسرعه من جد رايح الجامعه !!
نظرت لها مستغربا
ايه رايح الجامعه ليه في شي !!
قالت واحنا رايحين الجامعه عندما موعد في مستشفى الجامعه
الله يخليك
ممكن توصلنا معك
قلت في خاطري طيب وصاحبي هذا اللي منتظرني في البيت
فتذكرت ان عنده سيارته الخاصه
قلت يالله نكسب اجر في هالمساكين !!
ووافقت وانطلقت الى الجامعه
كانت الفتاة جريئة
ماتمر دقيقتين الا تفتح موضوع !!
قالت وش تدرس
انت متزوج والا لسى
كم لكم سنه عايشين في بيتكم
تصدق انكم جيراننا من بعيد
بس اول مرة اشوفك !!
انا دايما نروح مع الشارع هذا بس مافي يوم شفتك فيه الا هاليوم !!
ادركت بعدها
ان الفتاة هو لبست غطاء اطبقت عليه عيناها
ولكن تشوف القاصي والداني في كل اتجاه وبشكل مريح جدا !
كنت ارد على اسئلتها بشكل مختصر جدا
وفجأة توقفت عند باب المستشفى
وقلت خلاص وصلنا
قالت ماشاء الله بسرعه !!
قلت يالله انزلوا وبالسلامه انشاء الله
الغريب انها قالت طيب انزل معنا !!
اقول في نفسي ( لايكون شايفتني من بقية اهلها وانا مدري )
قلت لا مشكورة عندي اختبار
المهم اصرت قالت لا لازم تجي معنا
قلت والله مااقدر عندي اختبار وتأخرت عليه
بعد الحاح ورفض
رضخت للامر الواقع وقالت طيب اوكي الله يوفقك
خلينا نشوفك !!
قلت على خير انشاء الله
وفعلا بعدها رجعت ذاكرتي
يالله زميلي الحين وش بيسوي
قاعد اتخيل ان ابوه او اخونه اخذوا سيارته وهو ماداوم والاختبار على وشك البداية
انطلقت مسرعا الى القاعة
على فكرة
ايامها ماكنا نملك جوالات كي نتصل على بعض كنا نكتفي بتلفونات البيت
المهم دخلت الى المبنى
وانا ماشي في ردهات المبنى
لقيت زملائي واقفين واللي حاط ظهرعلى الجدار
وقاعدين يراجعوا للاختبار
وشوي انظر الى الجانب الاخر
الا والله اشوف هالوجه اللي مو غريب علي
طلع صديقي سبقني في وصوله للجامعه انا تأخرت قليلا عند المستشفى
يناظر فيني بعين حارررره جدا
سلمت
لم يرد
كيفك ابو حميد
لم يرد
المهم قلت ياخي قاعد اتكلم معك
وشوي الا انفجر في وجهي
ياخي وش هالبرود عندك
جاي ومسوي نفسك ماسويت شي
شلون لو ماكانت معي السيارة
كان فوت علي الاختبار
قلت والله حصلت لي ظروف
قال وش هالظروف يالله سمعني !!
ترددت اقول والا مااقول
قلت يالله خليني اقول اهم شي اكون صادق معه
وحكيت له قصة البنات
وانا احكي وهو ينظر لي بغرابة
وبعد ماقلت وهاذي كل السالفة
طار بوجهي
قال الحين عشان بنات تتخلى زميلك
الحين عشان بنات كنت بتحرمني من الاختبار ؟؟
وهاتك ياتهزيء فيني وانا ساكت عاذره متنرفز
قلت ياخي لو انت بمكاني كان عذرتني
ضحك ضحكة سخرية قال لا والله
طيب تعال خلي واحد يحكم بيننا ويشوف الحق مع مين ؟؟
قلت في نفسي والله هاذي البلشه
جرني جر >> حسيت نفسي مثل خروف مودينه المصلخ !!
وشوي الا يوديني عند واحد من الزملاء
قال تعال احكم بيننا
وحكي له السالفة
قال وش رايك الحين فيه بالله مو حركة شينه سواها معي
وانا منزل راسي قلت الحين بيعطيني نصايح ومواعظ
شوي الا الحكم اللي بيننا ناظر في زميلي
قال والله معاه حق الا ويسحب عليك بعد
من زين هالوجه تبيه يمر عليك ويترك هالبنات !!
حسيت ان زميلي زرعت في راسه نخله من رد الحكم اللي حطه بيننا
وشوي الا رفعت راسي وانذهلت من رده وجلست اضحك
قلت هاه ماقلت لك ان معاي حق !!
قال بغضب والله انكم فاضين ماوراكم سالفه
الغلط علي اني جالس اخذ واعطي معاكم بالهرج
وجيت وحبيت على راسه ياخي والله اسف
اوعدك ماراح تتكرر
المهم نظر فيني قال
اوكي نشوف
وبعدها ابتسمنا ورحنا للاختبار
كان موقف حسيت اني نذل فيه بقوه مع صاحبي هههههه
بس والله بدون قصد
وبعد ايام وايام
دخلت النت وتصفحت المنتدى
وفجأة
افتح على صفحة المنتدى
تفأجات ان المنتدى سيطر عليه هكر
قفلوه
وسيطروا عليه
وحاطين رقم جوالاتهم
كنوع من التحدي
اتصلت عليهم
خير ياابو الشباب ليه مقفل المنتدى
قال أي منتدى ؟
قلت منتداي الفلاني ليه مقفله
قال والله مدري عنه
انا قفلت السيرفر كامل
لان في موقع عليه يعرض اشياء اباحيه
ويمكن موقعك من ضمن الاستضافه الخاصه بالسيرفر
ومثل منت عارف الخير يخص والشر يعم !!
قلت والحل
قال والله انا دمرت السيرفر كامل
يعني الله يعوض عليك
كلمت صاحب المنتدى
كنت اداري فيه
قلي يالله يمكن خيره لنا
والله يعوض علينا
وفعلا تدمر الموقع
وانتهى المنتدى
وكأنه لم يكن في الاصل موجود !!
عندها جاني تشبع
او ملل من دخولي للنت
ولكن قررت
ان اكون عضوا في أي موقع
وفعلا
سجلت في منتديات عديده
اشارك هنا
واكتب هناك
وهكذا
الى ان قررت ان افتح موقع خاص كي اجمع شتات مااكتب
وهكذا
استمريت على هذه الحاله
ان اكتفي بردودي على المواضيع
ولله الحمد بعدها
استرديت عافيتي وجلست اكتب
كما هو الحال في موضوعي هذا
لااخفيكم
كنت ارغب في سرد العديد من الاشياء اللي حصلت لي هنا
ولكن
ادركت تضجركم من طول المذكرات التي قمت بكتابتها وادركت ان هناك اقلام افضل
فأبيت الا ان اختمها اليوم
واقول لكم
انتم من اجمل مارأته عيناي بطيبكم وكرم اخلاقكم
وروحكم العاليه
كنت اريد ان اوصل لكم هدف في مذكراتي :
نحن نحب نعم ولكن مشكلتنا ان قلوبنا تسيطر على عقولنا وبعدها نندم !!
نحن نجلس على الانترنت كثيرا ولكن لاندري ان جلوسنا هذا يكلفنا الكثير واولها يلهي البعض عن الصلاة والنوم المبكر وفوق هذا اجتماع العائلة !!
نحن نعجب في اقلام كثيرة ولكن مشكلتنا اننا نحكم عليها من خلال كتاباته ونراه في عيوننا ملاك ولكن لربما نكتشف في حقيقته انه وهم لسراب لم يكن بالأصل حقيقة !!
نحن نشارك في المواقع ولكن لانعلم ماتخفيه خلف شاشات الكمبيوتر شخصية ذلك القابع خلفها
هل هو رجل او فتاة او انه يتقمص الادوار في كل مرة !!
ختاما
لايسعني الا ان اقول لكم
الف شكر على حضوركم هنا في مذكراتي ومتابعتكم لها
منقوووووووووووووووووووووووووووووووووووووووووو ووووووووووووووووووووول لعيووووووووووووووووونكم
السلام عليكم ورحمة الله وبركاته
طريقه السرد رااااااااااااائعه وجميله
شـكــ وبارك الله فيك ـــرا لك ... لك مني أجمل تحية .
السلام عليكم ورحمة الله وبركاته
يسلموووووووووووووو
السلام عليكم ورحمة الله وبركاته "
تسلمين غنوجه والله يعطيك ألف عافيه على القصه الرائعه جداً والهادفه جداً جداً نقل موفق وعساك على القوه وتتحفينا بقصص أروع موفقه بإذن الله ... لك مني أجمل تحية . :cupidarrow:
| انواع عرض الموضوع |
 العرض العادي |
 الانتقال إلى العرض المتطور |
 الانتقال إلى العرض الشجري |
©2000 - 2024, Enterprises Ltd.
المنتدى برعاية مميزون العرب للخدمات الرقمية
www.z777z.com