ماني بساذج .. وتكــفى غيـّر اعذارك
ولاّ انـت يعني بعينك ويش شايفني؟
أتصل فيك دايـم .. اسأل عن اخبــارك
تقـول: مشغول وادري بك تصرّفني
مشغول وشّو وانا اللي أعرف اسرارك
واعْرفـْك أكثر ..ً وأكثر ممّا تعرفني
تراني افهــم عليك .. وكـــنّ أطـوارك
تقول شكلك زهقْـت وشبْــه عايفني
إذا وجــودي معــك ما يلفت انظــارك
فالأحسن امشي.. ولا أقعد وتنزفني
يجوز لامــن مشيـت .. الحال يتـبارك
أرتاح وانسى ويرجع للكرى جفني
صحيح.. ودي في هـذا العمر نتشارك
لكنّ وضعـي معـاك الحين يؤسفني
أنا طبــاعي كــذا مــن قبـل لا اختارك
ماقـطّ وجهي على اللي ما يوالفني
إمــا تجيــني .. وداري عِـــدّهـا دارك
والاّ على الوهم .. يكــفي لا تكلفني
تعبـــت والله .. ولا يمدينـــي اتـدراك
قطـار عمــر ٍ من اول معك طايفني
قلّي شسوّي إذا استبطــيت مشـوارك؟
الصبر يفني وبعـض الضيم مايفني
أخاف باكر يجي واغـْـدي "سِنمّارك"
ومن فوق قصـرٍ بنيته لك بتحذفني
واخاف تخلـف حـلاوة جنّتك .. نارك
واموت وحدي ولالْقى مين يسعفني
شف عاد لا من بــقالي غير تذكــارك
أحَــنّ مــن هالحيـاه .. بترْابتي دفْني
ارجوك أصْدق معاي وتكشف ْستارك
مـن دون احـلّفـْـك أو حتى تحلّـفني
سؤال واحـد .. وابيــك تجمّـع افكـارك
حتى تجاوب بكلّ وضوح وانصفني
إصـرارك اول علي هو نفسه اصرارك؟
ولاّ تغيّـرت ؟.. ياخي قول واتحـفني
ومن قبـل تحكـــي تأكـّــد إن مقـدارك
ما زال نفســه .. وما زالك تشرفني
واهـمّ حـاجه .. قبـــل تبـدي تِــعذّارك
عشان تسحـب.. وللذكرى تخلّـفْني
أبيك تعرف .. وتـدرك .. إنّ مسيارك
هذا أخيـــر .. وبعَـدْها منت شايفني
( إمشْ بطريقك!! " وانا بتجيني اخبارك " )
لاعاد اعَـرْْفك.. ولاعاد انت تعرفني !!
العرض العادي
