الجزء الثاني
ابو نورة والسهر عنوانه والهم والتجافي في عيونه ..
أبو رهف شغله الشاغل وشلون ياخذ بحقه من خالد ..
مره يفكر في جيرته لأبو خالد ..
ومره يفكر في حرقته من خالد ..
أبو خالد بعد مرور شهر شك من تعامل أبو رهف وتصرفاته وكل يوم يتجنب أبو خالد مع العلم أن العشرة اللي دامت بينهم عشرة طويلة وما هي سهلة . .
أبو خالد كل يوم يهوجس مع نفسه وش اللي حصل لأ بو رهف وقرر يواجهه بطريقته الخاصة
وفعلاً قدر يصادف أبو رهف وسلم عليه لكن مارد عليه السلام ..
أبو خالد .. كل شئ أضنه يصير لكن ما ترد السلام علي يا بو رهف ما هقيتها منك .
ــ لو إنك تعرف حق الجيرة وتصونها أنت وعيالك كان ما حصل اللي شفت ..
ــ أفا .. يا أبو رهف .. وش شفت مني عشان توصل للمواصيل هذي ..
ــ إسأل نفسك وعيالك وتعرف ؟
أبو رهف قطع الوقفة مع أبو خالد وراح للبيت .
وأبو خالد أول ما وصل للبيت طلب عيالة يجتمعون
بندر وناصر وخالد
وأجتمع وياهم .. وقال يا عيالي
الدنيا تفرق ما تجمع .. اليوم تقابلت أنا وأبو رهف وبصراحة ما هو أبو رهف اللي أعرفه من شهر وهو يصد عني .. وسألته وش اللي صاير يا أبو رهف قال أنت ما تعرف الجيرة وما صنت الأمانة أنت وعيالك ..
واليوم يا عيالي .. إن كان أحد أخطاء على أبو رهف علموني .. وأنا شفت في عيونه شر ما يعلم به إلا الله ..
بندر وناصر قالو ما نذكر أنا قصرنا في حق العم صالح .. وخالد ما رد ..
يا خالد ياولدي .. حصل منك على جارنا أبو رهف شئ علمني ..
خالد تغير شكله وبدت عليه علامات الخوف .. وقال يا بوي ما اذكر شئ .
قال أطلعوا يا عيالي . . وأنت يا بندر خلك معي ..
بندر يا ولدي أبو نوره ما تكلم وتغير علي إلا إن فيه شئ والحين أبيك تصارحني
فيه شئ علمني به قبل لا يطيح الفاس في الراس .
بندر عنده خبر عن علاقة خالد برهف وكذلك ناصر كلهم يعرفون وخبر أبوه بكل شئ وبعدها تغير وجه أبو خالد وصارت الدنيا كلها ما تسوى عنده شئ ..
قال يا ولدي الله يريحك يوم علمتني .. والله إنك شليت هم كبير من صدري .. ولكن حل مكانه هم أكبر .. والله يقدرني على حل هذي المشكلة ..
والحين وأنا بوك .. باخذ خالد معي وبخفيه عن الناس عشان ما يغدر به أبو نوره
وأنت أعزم جارنا أبو عبدالله على عشاء القابلة وخل أخوك ناصر يجهز العشاء .. وأنا بروح أشوف مكان طيب لأخوك خالد وبكرة نتقابل على خير .
قال أبشر يا بوي ..
تقابل أبو عبدالله مع أبو خالد وتكلم بو خالد ..
يا بو عبدالله حصل بيني وبين أبو رهف مشكلة وهو زعلان علي .. واليوم عندي رسالة مضمونها هدية أبيك توصلها له ..
وتقوله إن كان ترضية فهذا اللي نبيه .. وإن كان ما أرضته
فقله عندي صقرين .. يختار واحد منهم وأنا أجيبه بين أيديه
رد أبو عبدالله قال أبشر يا أبو خالد وإنشاء الله تتصافى القلوب واللي سويته طيب .
توجه أبو عبدالله بالرسالة في وسط صندوق ..
ورد أبو نوره .. ما أبي هدايا ولا رسايل.. اللي أبيه باخذه بيدي
أبو عبدالله استهد باالله وأستعذ من الشيطان .. وشف الرسالة والهدية وإن رضيت فخير على خير .. وإن ما رضيت أبشر بالي يرضيك .
ـ خير إنشاء الله بردلك خبر لكن إن كان تبي تسمع جوابي الحين ً أباخذ حقي بنفسي ..
استعذ بالله من الشيطان وأنا في انتظارك ترد علي .
أبو نوره أظلمت الدنيا في عيونه ولكن مجبور يفتح الصندوق فتح الصندوق وحصل شاش مغطي الهدية وفوقها ورقه مكتوب فيها ..
يا أبو رهف والله ما رضيت اللي حصل من ولدي خالد
ويعلم الله ما دريت الأ البارحة ولكن الهدية في الصندوق وكل اللي أبيه منك تسامحني أنا وولدي خالد وهي عوضك في بنتك رهف
رفع الشاش من فوق الهدية وكانت الهدية راس خالد مقطوع .
أبو نوره ما تمالك نفسه وخيم البكاء في عيونه وتمتم بكلام
لو بقي خالد حي كان مت من الحسرة واليوم حقي جاني .. والله يسامحني ويسامحك يا بو خالد .
وفعلاً في اليوم الثاني دفن راس خالد
.. وقابل أبو عبدالله وقال .. سلم على أبو خالد
وقله .. الرسالة وصلت
والقلوب تصافت
والحر ما يجيب إلا حر ..
والصقور خلها في أوكرها
والميتين الله يطيب ثراهم ..
تحيات اخوكم
ورد ~ وبارود
العرض العادي
