مذكرات زوج في الخمسينيات
المشهد الأول يقول:



البارحه ذهبت أم العيال الى عرس وفي السابق كانت هكذا ليله تكون مثل ليله الأنس في فينا ولكن دوام الحال من المحال



في تمام الساعه العاشره بتوقيت "بيتنا" جائت من عند الكوفيرا وكانت تضع طن من المكياج يكفي لتجميل نصف حريم لبنان ونظرت الي وقالت: ها وش رأيك؟ فقلت بلساني تهبلين .....اما قلبي فقال وهل يصلح العطار ما أفسد الدهر.....قالت وهي تستعد لحشر كتل الشحم في الفستان المسكين وحاولت أن تضع شيء من الغنج والدلال في صوتها .....عاد لا تنام الليله ...ابي احاول أرجع بدري.....قلت مع بدايه غثيان في الكبد....متي يعني؟...قالت يعني ثلاثه ونص أربعه...قلت...ابنتظرك علي احر من الجمر ولو جاني النوم راح اصقع راسي بالجدار عشان يطير مع انه ودي لو اصقع راسها هي بالجدار المهم:



بدأت عمليه حشر جسمها في الفستان وهي عمليه أشارك فيها....وتبدأ طقوس الحشر بعمليه لبس المشد وهو حزام من المطاط القوي..تحاول فيه جمع الكرش ودفعه للخلف...وهي عمليه مضنيه لا أفهمها أطلاقا....المهم تم حشرها بعون الله في الفستان..... وبقيت العمليه الأصعب وهي صك السحاب وهذه مهمتي أنا.....والمشكله إن حديده السحاب صغيره وصعب مسكها وشدها بقوه ما أعرف ليش مايخلونها مثل حقت الشناط كبيره شوي المهم....بدأت هي تشفط نفسها بقوه وأنا أحاول تسكير السحاب اللعين...وما أدري ليش تذكرت طريقه تسكير شنطتها اذا جينا نسافر حيث أقف على الشنطه وبعدين أسكر سحابها..وتمنيت لو أقدر أبطحها هي وأضغط على ظهرها برجليني وأسكر السحاب اللعين....المهم بعد معركه شرسه وكر وفر تمت العمليه بنجاح...وتنفست الصعداء مع اني ما ادري وشي الصعداء......وانطلقت هي للعرس............يتبع.... ....



مذكرات زوج في الخمسينيات
المشهد الثاني



غادرت وهي تحمل الجزمه ام كعب بيدها لأنها ما (تركبها) الا في هكذا مناسبات.....وحلقت انا في عالمي الخاص عندي أربع ساعات عزوبي وقمت أوزع وقتي الثمين.....على نفسي انا وبس وسهرت سهره جميله مع الأخبار والمنتدى ....!!!



وفي تمام الساعه الثالثه صباحا بتوقيت "بيتنا" طلعت فوق بسرعه وجبت طاسه وحطيت فيها ثلج ومويه ومنشفه صغيره وجبت من الفريزر الكماده البلاستيك ومن الصيدليه بنادول وتانيول وكل شيء اخره اول ....وركضت للسرير وانسدحت مثل اي فار ينتظر غزوه قطاوه (بساس)



وفي تمام الساعه الثالثه وسبع وثلاثون دقيقه حسب توقيت "بيتنا " سمعتها جايه قمت وبسرعه وضعت الكماده على راسي وأتخذت وضع البؤساء.............كني ابي اموت خلال دقائق.....
دخلت وقالت اسم الله عليك وشفيك اجبتها بصوت ضعيف مع بحه ....تعبان حاس معي سخونه ...ثم وضعت فاصل من الكحه الخفيفه....وبدأت المناوره... قالت....ياشيخ ما فيك الا العافيه قم خذ لك دش ،وأسوي لك عصير برتقال....صدقني هذا كسل وبعد الحمام يروح _اوف ما راح تستسلم ناويه شر_



قلت بنفس الصوت السابق....يابنت الحلال اي حمام...انا ما جاب لي البلا الا الحمام بعد ما رحتي تروشت وطلعت من الحمام والظاهر صفقني المكيف......وضعت يدها على جبهتي وقالت بصيغه جازمه ما معك حراره....قلت يمكن صخونه داخليه.... ..وقلت لها وأنا أحاول أنهاء الموضوع تعالي بس اتمسك فيكي..ابي اروح الحمام....وقمت بالحركه البطيئه مستندا على كتفها وعندما أستويت واقفا رجعت وجلست بحركه مسرحيه........وقلت ماش حاس بدوخه ما اقدر.امشي..هاتي لي قاروره مويه صحه فاضيه......عندها شعرت ان هجومها بدأ يضعف وأن الفرج قريب...........فقررت ان اضرب الضربه القاضية ،وقمت أتاوع ..........اووووع....... .اووووع.... ....... وهي تقول وشفيك ..وشفيك صرخت قلت حاس بمر علي كبدي....احسن افرشي لي تحت مادري وشو هذا وأخاف اعديكي..........وهكذا نفذت بجلدي



...........يتبع..........



مذكرات زوج في الخمسينيات
المشهد الثالث



في ضحي اليوم التالي وعلى الفطور......سألتني بلهجه جافه ووجه عابس....شلونك اليوم عساك اشوى قلت لا أبشرك اليوم احسن بكثير الحمد لله....والله البارح...أعوذ بالله....ما ادري وش جاني، كنت مره متحمس نقعد مع بعض....لكن الشكوى لله .......شعرت من نظراتها انها غير مقتنعه



وأن الموضوع ما راح يعدي على خير...........وساد صمت........وفجأه وبدون اي مقدمات قالت:



هالحين انت ليش ما تاخذ من الحبوب الي يقولون عليها...او تروح تكشف.........قلت يابنت الحلال



انا ما في الا العافيه......وهذي الحبوب لها اعراض خطره.......وأنا البارح مريض....بعدين لا تنسين العمر.....والله اني الا مشيت دايم اتلفت وراي اخاف يطيح مني عضو وانا ما أدري.....ضحكت وقالت لا مهوب طايح منك شيء...المهم وش تبي غداء...قلت على كيفك...قالت انا مشتهيه سمك وروبيان،



قلت عز الطلب......وعلى الغداء...وضعت امامي حزمتين كبيره من الجرجير....وعرفت انه فيه هجوم



...............يتبع...... ........



مذكرات زوج الخمسينيات
المشهد الرابع



وأقبل الليل والليل مخيف...وغادر الأولاد الى غرفهم.....وخلي لها الجو بالفقير الى رحمة ربه ولطفه .



قالت وش تبي عشاء.....قلت...مادري والله...ماني مشتهي شي...قالت....وش رأيك أحط لك عسل حضرمي...جابته لي زميله..تقول انه حر...وزين...لحظتها عرفت أن الغزوه جايه جايه وأن الهروب مستحيل....فقررت الأستسلام.....وقرأت في سري ايه الكرسي والمعوذات وتوجهت الى غرفه النوم،كمن يساق الى حبل المشنقه.....وقامت هي تركض كصبيه في العشرين الى المطبخ تجيب العسل.



وبعد العشاء وفي تمام الساعه العاشره وسبعه عشر دقيقه بتوقيت "بيتنا" بدأ هجومها بأن تسلحت بـ........وبخت نصف قاروره عطر ....وللمعلوميه هذا كل الي عندها من أسلحه...وقمت أنا وأنسدحت على السرير أنتظر قضاء الله وقدره...وعلى لساني دعوه اللهم ألطف اللهم ألطف .....



وقامت هي بالروتين المتبع...قبل الغزوه.....أقفال باب غرفه النوم...وتشغيل التليفزيون على قناه الجزيره أو العربيه...عشان لو صحي أحد من الأولاد وجاء للصاله الملاصقه لغرفه النوم مايسمع شي.



قالت..اطفي النور...قلت على كيفك...وانا اتمنى تطفيه...قالت احسن أطفي الي فوق واولع الأباجوره وهكذا كان.....



قالت..أهمزك؟...قلت اي والله تكفين ترى عظامي الى هالحين توجعني ونسدحت على بطني وبدأت عمليه التهميز.....وأثناء عمليه التهميز خطرت في بالي فكره...وهي كمحاوله الغريق التمسك بقشه.....قلت وش رأيك تدهنيني بفكس...وكانت في تلك اللحظه الحاسمه تهمز الرقبه فضغطت عليها بقوه حتي كدت اختنق....فقلت ياشيخه...أمزح.
...........يتبع.......

لا خلاص الباقي ماراح اقوله لكم هههههههههههههههههاي