ابيات اعجبتني ..



الليل يمساعد ترى صدري من الضيقـه يفـوح
فوح الدلال الي مركاتن علـى جمـر الغضـاه

البـارق الـي تحتريـه العيـن عيـا لايلـوح
والعمر قفـا ثلثلـه الاول ولا ادري وش وراه

اصارع الايام وقهرهـا وانـا عنـدي طمـوح
وان ماوصلـت لغايتـي معـاد لدنيـا طـراه

البارحه وانا اتصفـح فـي ملفـات الجـروح
لقيت بيـت" للحبيـب مذيـل ابصمـه شفـاه

الشطر الاول ذاكر الحـب الحقيقـي مايـروح
والشطر الاخر من دموعه ماقدرت افهـم لغـاه

خليتني بين الرجا واليـاس يالوجـه السمـوح
اطرد ورى حلم الوصال الي عجزت الحق مداه

ارخيت سمعي في صدى ذكراك واطلقت الشبوح
ولجت ضماير خافق" يهواك والحـزن يغشـاه

بنيت لك صرح" يعدونه من طـوال الصـروح
او وصيت قلبي لاحضر طيفك يصونه ويحمـاه

عليك لامن ناحـت الورقـا الاحيهـا وانـوح
وبسبتك اقنب قنيـب الذيـب وجـاوب عـواه

مدري وش الي جاب ذكرك في ملفات الجـروح
مع انك اول من سكن قلبي وحلق فـي سمـاه

عزاي لاشفتك تحب الوصل فالوقت الشحـوح
وعناي لاشفتك تشيـل الـود وتشـح بعطـاه

مشكلتي اني لاكتبتك اقـدر اقـراك بوضـوح
ومشكلتك انك تكتب بهرج" عجزت افهـم لغـاه