تكملت قصتي مع ابواحمد
اشتغل المركز وتواصلت مع المراكز القريبة وتاكدت من كل شي وودعت ابو احمد العجيب الغريب
وقلت له ابواحمد لي سؤالين وان سمحت لي بثالث سالت
قال اسال وابشر بالعلوم الصادقه نعم انا اؤكد انه صادق وعلى فطرته لكن تقديره للامور أحياناً غير سليم
قلت اول سؤال مشغل بالي هو هل انت مبسوط مع هالكم من الحريم مثل ما تسميهم ومع انه في ذمتك 3 فقط والباقي مابين متوفيه او مطلقه
قال اسمع الحريم مثل بعض !! كيف يعني ؟ اساله انا قال يعني مثل بعض !! !!اكرر السؤال وازيد يعني كيف ومن اي ناحية ؟ متشابهات او متساويات مثل ما تقول ؟ قال اقولك مثل بعض يعني مثل بعض وكنه تضايق او ما عنده جواب محدد مدري
طيب اتركك لكم الجواب وانا عن نفسي ما قدرت احصل منه الا تاكيد ان الحريم مثل ما يسميهن مثل بعض وبس
ننتقل لسؤالي الثاني عساه يجاوب وما يتهرب مثل الاول ويعطيني جواب سترتش ( هذي اضفتها من عندي سترتش ) والا وقت كتابتي لهالكلام ما كنت اعرف شي اسمه سترتش وماكان فيه الا قطن وحرير مشروك بقطن وانواع والوان متقاربه
المهم جوابه ما يكون مثل الاول مطاطي قديمه مطاطي صح
قلت اتكلنا على الله
السؤال يا ابواحمد الله يعفو عنك ويزيدك حرمة رابعة
تكمل النصاب الشرعي وترتاح وتريح حريمك من هالنقص
السؤال وان طال هو كيف تصرف على هالكم من الاولاد والبنات والزوجات
(
ابواحمد يصرف على زوجاته المطلقات حتى يتزوجن ولو ما لهن منه عيال ) لله دره من رجل فيه من الوفاء والصدق مع الله
سالته سؤال جانبي ليه تصرف على زوجه طلقتها وما لك عندها لا ولد ولا بنت قال بكل طيبه مسكينه اهلها حالتهم ضعيفه وانا اتكفل بها حتى ربي يرزقها بزوج
نعود للسؤال من وين تصرف عليهم وانا بصراحه مدري كم عدد عياله اللي اعرف ان عنده الان 3 زوجات غير المطلقات انما العيال مدري كل شوي طالع لنا بزر صغير وكبير وبنات واولاد واللي كبير ومعه سياره واشكال والوان الله يخليهم ويصلحهم
قال لي انا راتبي ضعيف في الوزارة شغلته مستخدم ومع الوقت رفعوه حسب كلامه الى كاتب لانه يعرف يكتب ويقراء على قد حاله وشهادة لله هو اول شخص يدخل المسجد واحيانا يؤذن ويؤم الناس للصلاة وملازم للقران
وقال راتبه ما يكفي هالدويله يقصد عياله وزوجاته يصغرهم ويقصد هالدوله ماشاء الله يكرر كلمة ماشاء الله قولوا ماشاء الله
اي شي حلال يشتغل فيه يعني سواق للبنات ومعلمات في قرى قريبه فراش للمسجد براتب ضعيف طباخ لو فيه مناسبة عند احد واهله ماهم حاضرين او عزوبي مثلي يقوم بكل شي اهم شي سلمه قيمة الذبيحه وهو يدبر الامر يشتري ويذبح ويطبخ ويجهز الاكل واغراضه والقهوة والشاهي
وطبعا ماحد يتشارط معه على مبلغ يجي يقول لك كلفت العزيمه كذا وانت وكرمك وش تعطيه تعبه ما يعد بعدك ولا يسالك
ومن الخدمات اللي يقدمها بيع الماء على السكان لانهم مامن ماء جاري يعبي وايت من منطقة قريبه ويمر على البيوت كلن يجهز الجراكل ويبيعهم الماء ويكسب
وخدماته كثيرة وما عنه استغناء للجميع الكل يسال عنه عرفتوا جواب السؤال الثاني
السؤال الثالث اللي وعدتكم بجوابه اخر الجزء الاول وهو ليه زوجتك الاوله سبب زواجك للبقية من الزوجات البالغ عددهن فضل صلاة الجماعه على الفرد 27 درجه قال بعد تنهد
قال تقدمت لجدها لامها لان ابوها متوفي وجدها رجل كبير وله مكانته في القريه وزوجني على صداق بسيط وكانت اجمل بنت في القرية والقرى القريبة ومشهورة بالجمال وكان جمالها سبب تكبرها وتعاليها ورزة خشمها مثل ما يقول وكسرت خشمها وانا ابوك كفو قلت له كفو وانا غير مقتنع لكن لزوم السوالف
طيب نعرف ليه هي السبب او بتمغط الجواب مثل الاول قال من تزوجتها وهي عند كسرة مراية معلقة على الجدار تصبغ وتدبغ وتزين ومامن شغل الا بالدف والنزر واحيانا الضرب لكنها عنيدة ومدلعه وانا اردد لها من غشامتي طبعا اول زواج له وغشيم الان خبير على اعتقاده مع انه ما عرف الفرق ين زوجاته الى الان كلهم مثل بعض مثل ما قال
قال كنت غشيم وما دريت ان ترديدي بعض الكلام ومن هالكلام اللي يقوله لزوجته ان لولا مكانة جدها كان ادبتها وكانت تكبر براسها هالكلمة وتتعظم عندها وتصغر نفسي عندها
وفي يوم قالت لي ما تقدر تزوج علي وجدي موجود والله ان يوريك شغلك
كيف انا اقدر جدك لسنه ومكانته لكن ما اخافه ولا اخاف
غيره
كان يمثل لي المشهد اللي دار بينهم هو متعود يمثل حتى الاشخاص اللي يتكلم عنهم حركات يدينهم ورؤسهم واصواتهم وكان يقلد صوت زوجته قالت له اني جدي يكسر راسك قال : قلت لها وبصوته الاجش العالي النبرات قلت لها لا جدك ولا جد جدك يخوف ابواحمد وانا افز من عندها و امشي على رجلي لان ما معي وقتها سيارة للقرية اللي تبعد عن قريتنا مسافة يمكن ثلاثين كيلو وانصى ولد عم للوالد قلت جيتك ناصي وطلاب قال ابشر يقولها بتفاخر وقوة قلت بنتك فلانه ابيها على سنة الله ورسوله ( مسلسل بدوي ) قال جتك وانا عمك وبعد اسبوعين والا البنت عندي بالبيت مع زوجتي صدمت زوجته الاوله وبكت وراحت بيت جدها
وجلدها جدها وقال الرجل له 4 حريم في شرع الله وما تطلع
من بيت زوجها الا العاصي وجابها لبيتي .. جدها رجل عارف بامور الرجاجيل المهم عاشت معي زوجتين والكل منهن انجبت اولاد وبنات وبعد سنوات توفيت زوجتي الثانيه وجلست بصغارها والزوجة الاوله علاقتي معها ماهي زينه ( وين اللي يقول الحريم مثل بعض ) قال لو الاوله اللي ماتت كان الثانيه تربيهم لكن الاوله ماتتقبل حتى عيالها ( ما الومها مضروبه حتى ترجع له يعني زواج بالغصب
المهم اظنه تعود ابواحمد على الزوجتين وبعد كم شهر طق له حرمة ثانيه مثل ما يقول طقيت لي بنت وبعد سنه تقريبا تزوجت ام عيال صغار ايتام وصار عنده 3 زوجات
وبعد ان كملت شغلي ودعته وتوقفنا على ان عنده 3 زوجات بعد وفاة الثانيه ابواحمد قصصه مع زوجاته ال 27 تحتاج تفرغ لان لكل زوجة لها قصة
وقابلته اول مرة وعنده 3 زوجات بعد طلاق الرابعه بايام فقط
اتمنى ما تكون مملة هالمذكرات مع انها قديمة شويتين واختصرتها لان بعض اوراقي ضاعت
العرض العادي
