السلام عليكم ورحمة الله وبركاته


يا جماعة الخير الله يسعد اوقاتكم بكل خير وحب

انا شاب ابلغ من العمر 26 سنة مقبل على زواج ان شاء الله في شهر 3 عربي

وانا والله ما عرف كوعي من بوعي مره

قريت في منتدكم الفاضل عن ليلة الدخلة لاكن في الحقيقه انا افتشل اني اطبق ها الحركات

انا بدوي واشوف الكلام اللي كاتبينه اقشر وشين والله اني حاولت اقراه صار لي 3 اسابيع لاكن عيت نفسي

تتقبله احس انه فشيله احس ان المره بتنقد علي لو سويت معا الكلام الموجود في منتداكم .

قلت خلني اسئل ابي !!!

سئلته يوم كان بروحه قلت له يبه وش اسوي ذاك الليلة

التفت علي وحسيته بغا يصكني بالدله قال وش تسوي الله يقطع ذا الوجه رجال طول عرض ما تعرف وش تسوي
اشقلها بكرعانها وتتسهل الامور ..

انا بيني وبينكم ايست من كلامه وش اشقل ذبيحه هي .

ودي بطريقة ما فيها من الحضاره الزايده اللي تفشل . ولا من البداوة اللي تمرض وتجيب الهم يعني حل وسطي .

والله يا جماعة اني كاتب لكم معاناتي وابي منكم الحل وارجو عدم السخريه مني

والله يجزاكم خير