السلام عليكم جميعا
عندي اليوم قضيه شائكه واللي هي تخص بعض حريم حوى طبعا
يتنكدون جنس حوى الين قلت حريم ولا قلت بنات واللي جاب
هالطاري اني جالس مع واحد من عمامي عمره حول 75 سنه الله
يطول بعمره ويسولف لي
قالي شف وانا عمك من اول الين وصلت البنت عمرها 14 قلنا
عليها خلاص صارت حرمه ولازم تتزوج وبعد زواجها باسبوعين
تشوف وجهها ولا هو شاين وما غير تطريش الله يكرمكم يعني
حامل وطبعا من اول الوحم حقهم يختلف عن حريم هالوقت ان
توحمت فهي اتوحم على خبز بر ولا برسيم ولا تمر سكري طبعا
معصي تقول يا ابوفلان ريحتك خايسه ان تسان يدفنها في البيت
لكن حريم هالوقت تسب وتسخط عشانها حامل ،، وما عاد اقدر
اطبخ وان دخلت المطبخ جتني دوخه يمه يمه وتقول ان شفت
الجريش حامت تسبدي ونفسي بايسكريم باسكن روبنز وتلقاه بوقت
الصقيع والبرد مدري وشلون تركب
وتقول لزوجها انت يا فلان ريحتك شينه اوووف وعععع صرعتني
بريحتك رح تروش ( ومسكين هالزوج ما غير يدربي بهالراس يروح
يتروش ويتنظف ويتعطر خايف على هالنونو لا تجي وريحته خايسه )
ايه نرجع لسالفة العم
يقول انا زوجتى ام راشد من اول يوم وهي حامل
حشا ماطور كهرب ما شاء الله خبركم من اول نشيطين لا رجال ولا
حريم من المزرعه للبيت موب مثلنا الحين مقاضي من كارفور ولا
بنده ويخب علينا
وتلقا الواحد يخاف على زوجته ويداريها ولا يقولون اول سنه مافي
حمال نبي نستمتع بحياتنا قبل يجي الطفل امحق
نكمل سالفة العم
طيب يا عم وام راشد ما توحمت على شي قال الا توحمت على ريحة
شماغي هههه يقول ان جيت من المزرعه حذفت شماغي عليها وهي تتلطم فيه .
نرجع لسالفة الزواج
طبعا 14 سنه سنه من اول يتزوجون ما شاء الله والحين
من 15 الين 20 فترة مراهقه تلقاها عمرها 20 وهي ما غير كل
ما قلت لها اميمتها انخطبتي قالت يعني وشو خطبه يقالها ما تعرف
وان عرفت تلقاها تقول لا ما ابي توني بزر
ومن 20 الين 24 فترة دراسة البكلوريا وزودها سنه تلقاها
مسيكنه تدور وظيفه ومن 25 الين 30 تلقاها يرحم حالها حاطه
لها شرووط تعجيزيه للزواج وان صار الزوج مكتمل الشروط كلها
طلعت فيه عذروب وقالت لا شين كانه خشمه كبير ههههههههههههه
مربط الفرس
اولا :
اقول لا تنفرون ازواجكم منكم بوحمكم هاللي مدري وشلون قايل تلقا
الواحد مسيكين ما بقى حصاة ما فرك فيها ظهره ولا ما خلا عطر او
كريم الا شراه من هالمحلات ولا فيه فايده.
وثانيا :
بنياتكم الله يستر عليهم زوجوهم بدري لا يكبرون ويعنسون وعن الدلع الزايد
( مع ذلك كله اقول الله يعين الحريم على الولاده )
نتمنى لكم حياة زوجيه سعيده
اخوكم / ابونواف
الرجاء عدم نسب او تحريف او نقل اياً من مواضيعي دون إذن مني..أو كتابة منقول وكتابة اسم المنتدى وأسم معرفي على الموضوع
العرض العادي
